Jáhkká Borch bargat buori barggu
Norgga boazosápmelaččaid riikkasearvvi jođiheaddji Ellinor Marita Jåma jáhkká sápmelaš ja loabátlaš Sandra Borch bargat buori barggu eanadoalloministtarin, ja lohká leat olu ovttasbargan Borchan go lei stuorradiggelahttu ja lea vásihan ahte son dovdá boazodoalu hástalusaid.
Dat stuorámus maid son dál vuordá ođđa eanadoalloministaris lea ahte son doallá lagaš gulahallama boazodoalloealáhussan, ja ahte heiveha ráđđehusa beales buori boazodoallopolitihka, lohká Jåma.
Sápmelaš ja sirbmálaš Nancy Porsanger Anti ges lea nammaduvvon sámi áššiid stáhtačállin. Jåma jáhkká Porsanger Anti bargat erenomáš buori barggu, ja son livčče háliidan ahte Porsanger Anti livčče stáhtačállin eanadoallodepartemeanttas go sus lea nana deaddu boazodoalus.