Sara Margrethe Oskala diktačoakkaldat «savkkuhan sávrri sániid» lea evttohuvvon Davviriikkaid Rađi 2016 girjjálašvuođabalkkašupmai.
Iđut-lágadus almmustahtii «savkkuhan sávrri sániid» jagi 2012. Diktačoakkáldat almmustuvai dárogillii 2014 namain «utrettelige ord», man čalli ieš lea jorgalan dárogillii. Iđut-lágádusa Nan Persen illuda go Iđut-lágadus lea almmustahttán dáid girjjiid, ja vel evttohuvvan dáinna stuorra bálkkašupmái.
Mearkkaša olu lágádussii
Nan Persen lohká mearkkášit sidjiide hui olu go girji maid sii leat almmustahttán árvaluvvo diekkáraš stuorra bálkašupmai. Dieđus lea girječállái erenomáš movttiidahtti go su bargu rámiduvvo, ja dat mearkkaša maid olu lágádussii mii girjji lea almmustahttán.
«savkkuhan sávrri sániid»
Sara Margrethe Oskal, gii lea čállán diktagirjji mainna lea árvaluvvon bálkkašupmái, lea neavttar, drámatihkkár, teáhterbagadalli ja filbmadahkki. Son disputerii Oslo Dáiddaallaskuvllas 2010, ja su dáiddalaš bargun lei sámi leaikkastallanárbevierru muitalusain ja luđiin, ja mo daid sáhttá lávddis čájehit. Barggu boađusin lei bálkkašuvvon čájálmas «Guksin guollemuorran». Dáinna lea Oskal mátkoštan festiválain, earret eara Davviriikkain, Ámerihkas, Kanadas, Australias ja Ruoŧas.
Sara Margrethe Oskal lea dal čallime iežas vuosttaš guhkesfilbma mánusa, ja ođđa leaikkastallanteavsttaid lávddi várás, diehtá Iđut-lágádus.
Vulget doaluide Københápmanii
Girjjálašvuođabálkkašumit geigejuvvojit Københápmanis skábmamánu vuosttašbeaivvi ja diehtalasat vulget sii dokko, lohká Iđut-lágádusa Nan Persen. Sii besset maid Dánmárkku ráđđehusa guossis fitnat máŋŋil go bálkkášumit leat geigejuvvon.
Ii leat vuosttaš heave go Iđut-lágádus lea almmuhan girjji mii árvaluvvo Davviriikkaid Ráđi bálkášupmái. Go lágádus lea moddii ovdal almmuhan girjjiid mat leat leamaš árvaluvvon Davviriikkaid Ráđi girjjálašvuođabálkkášupmái.
Deaivvadit earáiguin geat maid leat evttohuvvon bálkkášupmái
Dál vuorddašit sii iluin doaluid Københápmanis skábmamánu 1. beaivvi. Ja sii geat Norggas leat árvaluvvon bálkkášupmái galget deaivvadit Bæruma girjerádjosis čakčamánus, ja golggotmánus leat ges buohkat geat leat árvaluvvon bálkkášupmái bovdejuvvon panelságastallamii Helssegii, nu muitala Iđut-girjelágádusa Nan Persen.