Maŋŋá go lei geargan de logai ahte lei hui buorre ja somás vásáhus lávlut daid ollu mánáide geat ledjet boahtán geahččat ja guldalit su. Vaikko mánát eai máhte sámegiela de sii ledje ollásit mielde go Hildá lávllui ja juoiggai.
Mannan dálvve finai son maid Helssegis gos galledii golbma skuvlla. Doppe son lávllui ja muitalii sápmelašvuođa birra ja maiddái dat lei buorre vásáhus sutnje. Mánát čájehedje stuorra beroštumi oahppat eambbo sápmelaččaid birra ja sii iske maid ieža juoigat, muitala Hildá Länsman.
Luođi sáhttá leat amas gullat muhto das lea čiekŋalis dovdu
Hildá liiko sihke lávlut ja juoigat ja luođi birra lohká ahte soaitá leat ahte dan ii leat álo nu čáppat gullat. –Muhton olbmo beljiide sáhttá luohti leat amas gullat. Luođis olmmoš ovdanbuktá dan mii olbmo siste lea ja das lea juogalágán čiekŋalis dovdu ja oktavuohta sohkii, bearrašii ja lundui, lohká Ohcejohkalaš Hildá Länsman.