Heajumus mobiilaoládat Finnmárkkus
Norgga gulahallaneiseválddi loguid mielde lea Finnmárkkus heajumus 4G mobiilaoládat olles Norggas. Go geahččá viidodaga dáfus, de lei dán jagi njukčamánu loahpas 4G mobiilaoládat dušše ovcci proseanttas Finnmárkku fylkkas geain lei dát mobiilaoládat, ja Oslos ja muhtin eará Østlándda fylkkain ges 99 ja 94 proseantta 4G oládat. Ássiid dáfus lei Finnmárkkus 70 proseanta oládat, dat lea maid unnimus proseanta Norggas. Telenor oládatdirektevra Bjørn Amundsen muitala NRK:i ahte oládatproseanta lea sturron olu cuoŋumánu rájes dán rádjai.
