Oahpai sámegiela ollesolmmožin
Juovlamánus 2007s almmuhuvvui Lars Andreassena vuosttaš cd, mas lea namma "Bálges". Cdas leat 13 lávlaga, ja lávlagat muitalit movt nu bálgáid birra.
Dán cdas lea maid dat lávlla mainna Lars Andreassen gilvalii Sámi Grand Prixas 1998. "Garra ednam" lea lávlaga namma, ja dainna son šattai nubbin SGPas. Ja juste diet lávlla lea ge dat vuosttaš lávlla mas Lars lávlu sámegillii.
Sus leat sihke mearrasámi, julevsámi ja márkosámi máttut, ja ovtta lávlagis, "Nordlys", muitala ge Lars Andreassen man váttis dat lea leamaš orrut dakkar guovllus gos sámegiella lei badjelgehččojuvvon.
Háliida Sjakk-OG 2014 Tromsii
Maŋŋel go mearriduvvui ahte Norga dattetge ii galgga ohcat beassat lágidit dálve-olympia gilvvuid Tromssas 2018s, de lea Lars Andreassen oččodišgoahtán baicca Sjakk-OG dohko 2014s.
Ieš lea Andreassen 100 buoremus sjakk-spealli searvvis Norggas, ja lea Norgga buoremus sápmelaš dán gilvosuorggis. Ja son háliida hirbmadit ahte Sjakk-OG lágiduvvošii su ruovtturiikkas. Son vuolgá dán jagáš Sjakk-OGii mii lea Duiskkas, ja galgá dan oktavuođas doppe lávlut. Seammás áigu doppe hástalit olbmuid doarjut ahte 2014s leat dat gilvvut ges Tromssas.
