Ihttin searvá Sajane Olsen máilmmi cup gilvvuide taekwondo valáštallan suorggis, gosa leat čoagganan 1800 gilvaleaddji.
Guokte NM-golli
Diibmá olahii Sajane Olsen guokte gollii norggameašttirgilvvuin, sihke sparring- ja mønstergilvvus Stavangeris Lulli-Norggas.
Son oasálastá maid boahtte mánu NM-gilvvuin, ja ieš sávvá ahte olaha seamma buori bohtosiid. Muhto mieđiha ahte dál šaddá garraset gilvu go lea jagi boarraset.
Budapestagávpogis, Ungáras leat 1800 nuora geat oasálastet World cup gilvvuin dán vahkku. Sajane háliidii searvát gilvvuide vuoi beassá oaidnit makkár dásis gilvaleaddjit leat.
– Ikte bessen oaidnit hárjehallamiin movt earát orrot, ja jáhkan ahte leat vejolaš birget bures gilvvus, lohká son.
Sávvá čáhppes boahkána
Taekwondo valáštallamis leat iešguđet dásit. Vuošttaš lávki lea vilges boagán, ja mađi eanet hárjehalat, de oažžu eará ivnnis boahkána.
Sajane lea olahan rukses boahkána, muhto mihttu lea boahtte dálvvi mielde fitnet čáhppes boahkána vuosttáš dásis.
Budapestas gilvala Sajane "mønster" ja "sparring". Mønsteris ferte leat čeahppi čievččastit, časkit ja dustet. Bálansa maid ferte leat buorre.
«Sparring», de njuolgestaga lea doarrun, gos galgá čiekčat ja časkit čilge Sajane. Muhto ferte váruhit ahte ii čievččas ja čáskke nu garrasit ahte lápmašuvva. Ihttin álget «mønster»-gilvvut ja duorastaga ges «sparring».
Gula Olmmáivákki nieidda, Sajane Olsena Budapestas:
Sajane Olsen Budapestas nuoraid máilmmi cup gilvvus.
