Høgli lea dán jagi cupmeašttir Danmárkkus gos čiekčá FC København spábbačiekčanjoavkkus. Dál juovllaide lea boahtán ruoktot Sápmái ja áigu earret eará deaivvadit TIL jođiheddjiiguin ságastit su boahtteáiggi birra.
Háliida máhccat ruoktot
Spábbačiekči Tom Høgli muitala ahte su bearaš háliidivčče geassái fas máhccát ruoktot Norgii.
Juovllaide lea boahtimen ruoktot ja dan oktavuođas áigo son deaivvadit Tromsø IL jođiheddjiiguin. Son jurddaša 2-3 jagi guhkkosaš šiehtadusa birra.
Tom Høgli lea bajásšaddan Evenáššis. son lea čiekčan earret eará sámi riikajoavkkus, Norgga riikajoavkkus, TIL:s ja maid olgoriikkas.
Unnán beassan čiekčat
FC København gos Høgli lea olgešbeale bealušteaddji lea lihkostuvvan bures. Sii eai leat táhpen galle čiekčama maŋimuš áiggiid. Muhto Tom Høgli lea beassan čiekčat unnán. Son čilge dát lea danin go olgešbeale bealušteaddji sajis leat máŋga buori čiekči.
Romssa joavkku TIL čiekči Hans Norbye gii ges lea vuodjimen ruoktot Kárášjohkii juovllaide sávvá Tom Høgli bures boahtin. Soai leaba maid ovdal čiekčan ovttas TIL:s.