Norgga ráđđehusa ođđa sámeministtar, Jan Tore Sanner gii maid lea gieldda ministtar, háilida buoredit ovttasbarggu sámedikkiin.
Son lohka dehálažžan láhčit dili nu ahte lea vejolaš nannet sámegiela ja servodaga.
Illuda deaivvadit sámepolitihkkariiguin
Ođđa sámeministtar Jan Tore Sanner illuda deaivvadit sámepolitihkkariiguin sámedikkis. Ovddeš sámeministtar Rigmor Aaserud dat sávai lihkku bargguin ja geigii čoavdaga ođđa ministerii.
Jan Tore Sanneris lea guhkes hárjáneapmi stuoradikkis gos son lea leamaš olgešbellodaga áirras 93 rájes.
Son mieđiha gal ahte ii dieđe buot sámi servodaga birra muhto danin lea ge váldán veahkkin Anders Balsa gii dál bargagoahtá sámi áššiid stáhtačállin. Sanner sávvá maid oažžut buori veahki sámi politihkkariin. Sanner lohká iežas čuvvon sámedikki guhká ja danin son jáhkka oažžut buori ovttasbarggu nu ahte sámepolitihkka sáhttá ovdánit govttolaččat.