Gutnejahttojuvvo ánsomearkkain
Majestehta Gonagas lea nammadan amanuenssa ja NRK sámi vuosttas hoavdda Odd Mathis Hætta Gonagaslaš Norgga St. Olav Árvomearkka 1. luohká Riddárin sámi servodaga ovdánahttimis. Dát gudnemearka geigejuvvo sutnje otne Norgga árktalaš universitehtas Álttás. 81-jahkásaš Hætta lea dadjan NRK Sápmái, ahte dát lea gutnin sutnje ja vuogas go leat fuomášan dan maid lea bargan. Ánsomearka lea nammaduvvon Norgga bassi gonagasa Olav mielde ja das leat vihtta dási.