NRK Meny
Normal

Gussanjárggabeaivvit Finnmárkkus

Gussanjárggabeivviid oktavuođas Davvisiidda gielddas lágiduvvojit gonagasreabbábivddu máilmmi measttirvuođagilvvut boahtte vahkkoloahpa.

Alf Masternes er leder for Kunesdagan

Čájáhusgovva: Gussanjárggabeaivvit lágiduvvojit Gussanájrgga Davvisiiddas.

Foto: Privat (montasje av NRK) / Kunesdagan

Doalut Gussánjárggas álget suoidnemánu duorastaga 28.beaivvis gitta sotnábeaivvi 31.beaivvi rádjai. Gussánjárggabeivviin áigot earenoamážiid deattuhit mearrasámi kultuvrra ja leaikkastallama, čállet lágideaddjit neahttasiiddus. Doaluin leat fálaldagat sihke mánáide, nuoraide ja rávisolbmuide.

Gielástallaneahket

Odd-Einar Utsi og Odd Rune Hansen lihkostuvaiga bures diimmá Gussanjárggabeivviid gielásatallaneahkeda doaluin, ja searvaba maiddái dán jagi ge gielástallaneahkedii.

–Mii sáhttit lohpidit ahte sudno guoimmuheamis beassat gullát sihke smávit ja stuorit dáhpáhusaid birra, dieđihit lágideaddjit.

Internáhtamánát

Fálaldagaid gaskkas lea earret eará logaldallan internáhtamánáid birra, ja johtubargiid eallimis Áttánjoga buođđudanbargguid oktavuođas.Ingjerd Tjelle leage čállán girjji internáhtamánáid eallima ja dili birra, ja son searvá Gussanjárga-beivviide logaldallat internáhtamánáid eallima birra.

Gussanjárga lea smávva giláš siskkit Lágesvuonas Davvisiidda gielddas Finnmárkkus. Gussanjárggas leat odne 23 birrajagi ássi. Diibmá bohte badjel 300 guossi bearjadaga doaluide, ja mearkkaša ahte giláža olmmošlohku gararsit lassánii doaluid oktavuođas.

Čálgodoaimmaide ruhta

Barents musihka- ja kulturforum dat lágida Gussanjárgga beivviid. Foruma ulbmil lea bargat ovddideames musihka- ja kulturbarggu Barentsguovllus smávit doaluid bakte seammás go galget juogo akto dahje ovttas eará servviiguin lágidit smávit kultuvrralaš doaluid ja láhččet kulturdoaibmabijuid.

Doaluid badjebáza galgá doalvvuhuvvot ruovttoluotta gilážii mat dasto galget geavahuvvot čálgodoaimmaide Gussanjárgga gilážis, dieđihit lágideaddjit.