Johán Josefsen lea 80 jagi boaris ja son ássá Keaissas Porsáŋggu vuona beavžža bealde. Álo go lean fitnan su guossis de lea bussá dat vuosttaš maid lean deaivan su viesu feaskáris. Oktii jorai maid rieban su luhtte man gohčodii Mikkeline. Diet somás eallit eai šat gávdno ja nu ferte Johán buoremus láhkai birget okto. Su maŋimuš bussá jávkadii goaskin.
Ii nákcen loktet su boares bussá
Johán muitala oaidnán mo goaskin rasai su maŋimuš bussáin. Son gulai jienaid olggobealde ja go geahčastii olggos de oinnii goaskima girdileamen meara guvlui. Goaskin lei geahččalan doalvut su boares bussá muhto ii lean nákcen loktanit dainna, muitala Johán. Go manai olggos iskat ášši de gávnnai bussá bahát roasmmohuvvan ja jápmán.
Bussá lei su buorre skibir
Bussá lei Johána buorre skibir mii dagahii ahte viesus álo lei juoidá mii dáhpáhuvai. Ollu goaskimat leat mielddisbuktán ahte Johán ii šat sáhte gávdnat bussá dállui. Mannan čavčča doalvvui goaskin vel muhtun golgogáhttu Johána viesu olggobealde. Go ii sáhte rievdadit maidege de ii leat earágo dohkkehit dili mii lea čuožžilan, lohká Johán.
Ii lohpi báhčit boraspiriid
Ii leat lohpi báhčit goaskimiid ja dat muitala ahte ii gánnáhivčče doallat sávzzaid. Smávva lábbáid livčče goaskin hui álkit doalvut, lohká Johán. Ii leat buorre ahte lea šaddan nu ahte buot galget ráfáidahttojuvvot, loahpaha 80 jahkásaš Johán Josefsen Keaissas Porsáŋggu vuona beavžža bealde.
