– Jus olgorihka turisttat eai beasa bivdit liikká olu finnmárkku jávrriin ja jogain go dál, de fertejit sii heaittihit doaimmaset. Nu lohká turistafitnodaga eaiggát Markku Sillantaus Poršáŋggus.
Bargiidbellodaga sámediggejoavku dat ávžžuha fas gieldit turisttaid bivdimis guhkkelis go vihtta gilometera eret riikkageainnus.
Sillantaus šiitá ahte olgoriikkalaččat buktet guolledávddaid Finnmárkui:
Markku Sillantaus jođiha Skoganvarre Turist- og camping AS Poršáŋggus. Eanas guossit sis leat suopmelaš guollebivdit geat ieža dahje sin vehkiin mannet jávrriide dahje jogaide oaggut sihke dálvet ja geasset. Dušše njukčamánu rájes lohká son sin luhtte leamaš vihtta-guhttačuođi guollebivdi orrrume.
Bargiidbellodaga sámediggejoavku gáibida ásahit fas dan njuolggadusa mii lei ovdal go Finnmárkoopmodat hálddašišgođii jávrriid ja eatnamiid, namalassii ahte turisttaid ii leat lean lohpi mannat bivdit guliid guhkkelii go vihtta gilometera eret riikageainnus. Guolledávddaid njoammun lea okta dehálaš ágga dasa.
Guolledávddat
– Lea veadjetmeahttun bearráigeahččat leat go buohkat ráidnen bivdorusttegiid go ostet goarttaid interneahtas, dadjá bargiidbellodaga sámedikkejoavkku Per Ivar Henriksen. Danne galggaše dušše báikkálaš lágideaddjit lágidit turisttaide bivddu.
Muhto turistafitnodaga jođiheaddji Markku Sillantaus lohká stuorit vára ahte lullinorgga guolásteaddjit buktet guolledávddaid nugo gyrodactalis salarisa Finnmarkui.
Bargiidbellodat lohká dehálažžan maid gáhttet jávrriid badjelmeare bivddus, ja nu lohket sáhtášii gáhttet maiddái báikkálaš turistafitnodagaid.