Finnmárkku skuvllat leat buot vuolimusas našuvnnalaš iskkadeamis, mas leat iskan skuvllaid kvalitehta. Dat skuvllat mat leat vuolimusas dán iskkadeamis leat Hámmárfeastta, Álttá, Girkonjárgga ja Várggáid joatkkaskuvllat. – Dát hirpmahuhttá. Dan fylkkas gos don orut ja guđe joatkkaskuvlla váccát, das sáhttá leat olu dadjamuš makkár bohtosiid oaččut skuvllas. Nu ii berre leat, dan dadjá máhttoministtar Torbjørn Røe Isaksen.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.