Nu leat ge ealgabivdit searvvadan interneahtas vuostálastit álbmotmeahci ásaheami.
Anarjoga álbmotmeahci viiddidanplánat leat oaččohan olbmuid garrasit vuosttildit viiddideami.
– Eat dohkket viiddideami
Facebook-neahttaservvoža joavkku "NEI til utvidelse av Øvre Anárjohka nasjonalpark", lea čohkken juo badjel 400 láhtu.
Karášjoga ealgabivdiid searvvi jođiheaddji Jan Idar Somby, lea gullan joavkku birra ja lohká dan leat mearkan dasa ahte olbmot duođai beroštit áššis.
– Dat mearkkaša ahte mii eat dohkket dien viiddideami áigumuša, lohká Somby.
Duogažin dan áššái lea go Finnmárkku filkamánni galgá luondduhálddašandirektoráhta gohččuma vuođul kártet Anárjoga álbmotmeahci vejolaš viiddideami.
Filkkamánni hárddilda
Jus plánat ollašuvvet, de ráfáidahttošii 73 proseanta Anarjoga guovllus. Filkamanni maid cealká ahte guovlu, maid áiggošedje ráfáidahttit, ii leat anus, ja dat lea duldehan Facebookii searvi olbmuid vara. Jan Idar Somby ii ge leat ovttaoaivilis filkkamánniin:
– Olbmot han leat agibeaivvi geavahan dáid eatnamiid, ja áimmahuššan daid bures, nu ahte filkkamánni čuoččuhus ii doala deaivása.
Facebook-jovkui lea maid NSR jođiheaddji ja presideantaevttohas Aili
Keskitalo dieđihan iežas. Son ii doarjjo álbmotmeahci viiddideami ja danin lea searvan jovkui.
– Mu mielas orru dál nu ahte mis leat doarvái guovllut mat leat ráfáidahtton erenomážit Finnmárkkus. Dan dihte mun lean kritihkalaš dien viiddideapmai, lohká Keskitalo.