Ruoŧŧa ja Suopma leat árrat iđit otne formalalaččat ohcan miellahttun Natoi. Ohcamušat geigejuvvojedje váldočálli Jens Stoltenberga kántuvrii. Suoma presideanta lohká jáhkkit diplomatiijain nagadit gálgat čuolmma Tyrkiain mii biehttala dohkkeheames dán guovtti riikka Nato miellahttovuođa. Tyrkia presideanta lohká Suoma ja Ruoŧa várjalit terroristtaid go addet asyla kurdáriidda ja earáide geat vuostálastet su politihka.
Finnmárkku báhtareaddjiid vuostáiváldinguovddáš lea goasii guorus vaikko badjel 16 600 báhtareaddji leat boahtán Norgii guovvamánu 25. beaivve rájes. Mátta-Várjjaga sátnejođiheaddji Lena Norum Bergeng oaivvilda, ahte ádjána menddo guhká ovdal go báhtareaddjit bohtet gielddaide. Gielda sáhtašii váldit vuostá 140 báhtareaddji. Dál leat 11 báhtareaddji boahtán gildii, muhto ásset oahppásiid luhtte.
Romssas lea ásahuvvon Jernbane Nord AS fitnodat mii áigu oččodit ođđa ruovdemáđiia Fuoskkus Nordlánddas Finnmárkui. Ovdal geasi áigot jo virgádit unnimustá golbma ruovdemđii-áššedovdi, geat ovttas báikkálaš ja guovllu eiseválddiiguin galget bargat vai jođáneamos lági mielde beasašedje huksegoahtit ruovdemáđiia Fuoskkus Finnmárkui, čállá Klassekampen. Áigumuššan lea oažžut álggahandoarjaga 2025 Nášunála johtolatplánas.
Davvi-Norggas ruovdemáđii ovdánahttin ja huksen lea 60 jagi bisson seamma dásis go fas ruoŧŧelaččat leat huksen 400 kilomehtera ođđa ruovdemáđiia Davvi-Ruŧŧii, cuiggoda Jernbane Nord AS stivrra nubbijođiheaddji, Terje Traavik. Son sávvá maid oažžut doarjaga dása Natos ja EUs.
