«La elva leve»-filbma lea Álttá-Guovdageainnu-čázádaga dulvadeami birra. Filbma govvida movt Ellos eatnu-akšuvdna váikkuhii ovttaskasolbmui loahpageahčen 1970-loguin.
Hætta Isaksen lea ieš juste dál vásiheamen seamma lágan dili Riehpovuonas go maid filmmas galgá neaktit.
– Olles mu eallima leat Álttá-akšunisttat leamaš munnje stuora ovdagovvan. Juste dál lean Riehpovuonas joatkimen dan dáistaleami maid sii álggahedje. Dan dihte lea vel lassin erenomáš beassat neaktit, čállá son sosiála mediain.
- LOGA MAID:
Nuorra mearrasámenieidda muitalus
Olles filbma lea fiktiiva muitalus mearrasámenieidda Ester Isaksena birra. Son guođđá ruovttubáikkis Porsáŋggu ja vuolgá Áltái bargat oahpaheaddjin.
Doppe son čiegada iežas sámevuođa go ballá vealahuvvomis.
Álttá-Guovdageainnu-akšuvdna oalát rievdada su oainnu sámevuhtii, ja mearrida dáistalit sámi vuoigatvuođaid ovddas.
– Váibmuičuohcci fáttát
Dovddus ISAK-joavkku lávlu lea áŋgiruššán sámi vuoigatvuođain, nissonvuoigatvuođain ja luondduin ja birrasiin.
– Mun dieđán ahte filmmas leat scenat mat čuhcet liige ollu mu dovdduide, muitala Hætta Isaksen.
Son lea juo máŋgii šaddan bivdit bottu hárjehaladettiin, go sutnje badjánedje losses dovddut.
«Máze»-luohti Stjernekampas váikkuhii
Filbmabagadalli ja mánusčálli Ole Giæver lea giitevaš go Ella Marie searvvai neavttárin «La elva leve»-filbmii.
Giæver fuomášii dán nuorra sámi artista Stjernekamp-gilvvus.
– Go Ella Marie juoiggastii Máze, ja muitalii maid Máze historjá mearkkaša sutnje, de dovden gamus ahte die lea dat gean lean ohcamen iežan filbmii, muitala son.
Lihkku go gávdnui
Vaikko dá lea Hætta Isaksena vuosttaš filbma mas neaktá, de lea Ole Giæver hirpmahuvvan man čeahppi son lea.
- LOGA MAID:
Bagadalli ii oba jáhkkan ge gávdnat neavttára, mii sulastahttá filmma váldoolbmo nu bures go Ella Marie.
– Lea stuora ovdamunni go neavttár ieš lea juste dan dáistaleamis, masa filbma galggašii movttiidahttet geahčči. Beroštit sámi ja biras-áššiin, dadjá Giæver.
Šaddan rievdadit iežas
Dan rájes go Ella Marie beakkehii artistan leat sus leamašan oanehis vuovttat, mii lea ovtta ládje leamaš su šearu dovdomearka.
Filmma dihte lea son šaddan guhkkudit vuovttaid ja lohka iežas dego rievdan ođđa olmmožin.
–Álggos orui hui ártet, muhto dál lean hárjánan dasa ja liikon iežan vuovttaide, muitala Ella Marie.
Son jurdila ja lasihastte vel ahte sutnje leat guhkes vuovttat ávkin, dalle eai olbmot álo dovdda su go lea vánddardeamen.
Filbmabáddemiidda ráhkkana son olgoáimmus.
– Hui buorre leat ollu olgun, orrut tealttás ja dovdat dan ráfi mii olbmuin várra lei dalle ovdal go ožžo telefovnnaid ja mac:aid, loahpaha Hætta Isaksen.
LOGA MAID: