Geahča dahje guldal jearahallama Elin Kåveniin ovdal dán jagáš Liet Lávlut gilvvuid, Lulejus Ruoŧas:
Lávlu ja čoavjedánsu
Kárášjohkalaš Elin Kåven fárrii eret ruovttugilis nuorra nieidan juo. Skuvlavázzin doalvvui su Trøndeláhkii, ja maŋŋil fárrii ges Osloi. Doppe son lea ge bádden iežas vuosttaš olles cd, mii galgá fargga almmuhuvvot. Dasa lea bidjan nama "Jikŋon musihkka". Ovdalaččas lea son almmuhan EP, mas lei namma "Lahka".
Elin Kåven lea várra áidna sámi artista gii lávllodettin čoavjedánsu. Dán dáiddu son fuomášii mánnán juo, muhto manne máŋga jagi ovdal go duostai searvat kursii oahppan dihte juste dán dánsunmálle. Ja dát lea ge šaddan su dovdomearkan.
Movttet, muhto veahá balus
Golggotmánu 18. beaivvi searvvai Elin Kåven Liet Lávlut gilvui, sámi ovddasteaddjin lávlagiin "Áibbas jaska". Sihke jietnageahččalemiin ja váldogeahččaleamis logai iežas leat veahá balus. - Muhto nu guhkká go jietna ii leat nohkan, de lea buorre, leaikkastalai ieš.
Vuoitodovdu ii lean dán háve seammaládje go lei Sámi Grand Prixas, logai Elin Kåven ovdal finála Lulejus. Ja dán háve ii šaddan vuoitu Sápmái. Lei Korsihkalaš Jocques Culioli gii vuittii lávlagiin "Hosianna in excelsis".
-Beare in dál leat beahttán olles Sámi, bohkosii Elin ieš maŋŋel go lei čielgan ahte son šattai nubbin dán jagáš Liet Lávlut gilvvus.
Sápmi lea oainnát vuoitán dáid gilvvuid golmma geardde maŋŋálaga, ja leat ge Transjoik, Niko Valkeapää ja Johan Kitti/Elle Sara Bæhr geat leat vuoitán Sámi ovddas.