– Dát mearkkaša ahte boazolohku lea dál buorebut heivehuvvon guohtumiidda, lohká son.
Boazodoalu resursarehketdoallu 2015/2015 čájeha ahte ollislaš boazolohku Norggas lea njiedjan 232.900 bohccos 211.600 bohccui ovtta jagis.
– Dát čájeha ahte boazodoallopolitihkka mii lea čađahuvvan daid maŋemus jagiid lea buktán daid bohtosiid maid mii háliidit, lohká Dale.
– Beare olu bohccot
Son dadjá ahte guhkit áigge lea leamaš váttisvuohta go leat beare olu bohccot muhtin guovlluin Finnmárkkus.
2012 ledje sulli 42.000 eambbo bohcco Finnmárkkus go dat maid eiseválddit ledje mearridan ahte lea guoddi lohku. Boazodoallostivra gohčui dan dihte buot orohagaid main ledje beare olu bohccot unnidit boazologu mearriduvvon lohkui.
Oarje-Finnmárkkus eanemus niedjan
Eanemus lea boazolohku njiedjan Oarje-Finnmárkkus, gos boazolohku njiejai 95.900 bohccos, 80.400 bohccui.
– Dál lea mis boazolohku mii lea buoret heivehuvvon guohtumiidda, oaivvilda Dale.
Son dadjá ahte 2015 lea leamaš buorre jahki boazoealáhussii.
– Lea leamaš miessás jahki, njuovvanhivvodat lea lassánan ja biergohaddi lea buoret go máŋgga jahkái lea leamaš, lohká Dale.