Go dus lea beallješuvva dahjege tinnitus, de gulat jienaid maid earát eai gula. Muhtin olbmuin lea nuppi bealjis tinnitus, earáin gis goappašiid beljiin.
Govvit dál ahte čađat gulat dákkár jiena:
Na, nie gullo go beallji šuvvá.
Risten Elle Siris lea lagabui logi jagi jupman goappašat bealjit ja dát šuvva su nu muosehuhttá.
– Dat lea dego konsearta beaivvi miehtá. Muhtumin dat njurgot, nuppi vuoru ges čudjet dego trompehta, čilge son.
Illustrasjonsbilde
Foto: Erwin Wodicka / Erwin Wodicka - wodicka@aon.atEallit beallješuvain
Risten Elle Siri lea guhká eallán beallješuvain, ja muitala ahte buot vearrámus lea iđđes.
– Dalle lean okto ruovttus ja nu maid jaskat. De gal njurgot nu garrasit ahte mus lea bággu rahpat rádio. Mus čuodjá rádio measta jo ija beivviid, dušše danne vai juoga gullo duogábealde. Dalle jurddašan eambo das maid gulan radios go njurgunjiena birra.
– Muhto de lea dat gis heittot go mus lea rádio nu jitnosit, ahte in gula jus olbmot hupmet muinna, reaškkiha Risten Elle Siri.
Tinnitus ii leat dávda, muhto soaitá leat dávdamearka dahje vihki. Dávjá sáhttá leat váttis čilget manne olbmos šuvvagohtet bealjit.
– Doavttir lohká dat boahtá das go lean guhkit áigge bargan garra jienaid siste. Mun lean lagabui 20 jagi bargan vuos hoteallas, diskotehkas ja báras. Lean maid bargan rámbuvrras gos maid leat čađagaskka jienat.
– Mun lean bargan dakkár báikkiin gos álohii leat garra jienat.
Vaikko vel Risten Elle Siri leage loaktán bures barggus, de son livččii dalle galgat eará láhkai dahkat várjalit gulu.
– Nu mo mahkáš go lean diskotehkas bargan, de livččen galgat bealljebuncciid geavahit. Seamma maid buvddas, doppe livččen galgat váruhit ahte in čuoččo doppe gos mášiinnat njurgot ja japmet.
– Lea dieđusge olu maid olmmoš livččii sáhttán dahkat earáláhkai dál go jurddaša maŋit áigge. Nie maid go muoraid sahá dahje skohteriin vuodjá, de galggašii álohii geavahit bealljebuncciid. Dan mun ávžžuhan erenomážit nuoraid dahkat.
Ii leat volum-boallu
Njurgunjietna váibada Risten Elle Siri.
– Mun šattan geavahit olu vuimmiid gullat ja maiddái geahččalit jiena váidudit. Muhtomin váivašuvan go njurgu ovttatláhkai ja ii oba heaittege. Ii das leat makkárge volum-boallu mainna sáhtán jáddadit jiena.
Muhtomin gullá Risten Elle Siri dán njurgunjiena nu jitnosit ahte lea miella oaivvi dearpalit seaidnái.
– Láven maid geahččalit gieđaid doallat beljiid ovddas, dahje ruvvestit, muhto ii dasge leat mihkkege ávkkiid.
Dás gulat olles jearahallama Risten Elle Sirin:
