Dagny Larsen, Ikkaldasas Porsáŋggus lea báhcán leaskan.
Almmatge ii láittastuvvo okto orrut.
Su beaivvit gal golihit jođánit, illá astá muorrasoahtus viežžalit muoraid. Dán áhkus ii váilu bargu gal. Beivviid goarru gávttiid dahje riessu liinniid. Eará háviid gođđá girjefáhcaid dahje suohkuid, jus juoga galgá namuhit maid Dagny gođđá.
Eatnistis oahppan
– Lean vissa agibeaivve leamaš duojár. 14 jáhkášažžan gorron alccesan ruoná láđđečuvla, muittaša Dagny.
Goarrut lea Dagny mánnán eatnistis oahppan.
– Lean oaidnán mo biktasat leat gorron. De lean dađi mielde vadjan ja unnidan biktasiid mat ledje menddo stuorrá.
Dagny lea ovdal duddjon buot lágan dujiid mat gávdnojit, aiddo gálssohiid ja beaskka ii loga iežas gorron. Gákti lea duodji maid ain goarru, muhto ná ii leat leamaš álo. Son oahpai easka rávis olmmožin goarrut gávtti, ja nu son álggii ge goarrut.
– Gákti ii lean dábálaš mu mánnávuođas, Dat adnui dušše dalle go girkui lei čiŋadeamen.
Dál son lea gorron sihke alcces, iežas mánáide, mánáidmánáide ja máttarmánáide gávttiid. Goarru maid olbmuide geat sus diŋgojit.
GULDAL DÁS DAGNY MUITALEAMIN: