Eai suova dorvoohcciid Ruššii
Olgoriikkaministtár Børge Brende lea ožžon dieđu ahte Ruošša ii dohkket ahte dorvoohccit sáddejuvvojit ruovttoluotta Ruššii Storskog bokte Finnmárkkus. Brende dieđuid mielde leat ruošša eiseváldit dieđihan ahte gildosa duogábeald leat sihkárvuođa ákkat, muhto eai leat vuđoleabbo čilgen. Ruošša ja Norgga eiseváldit deaivvadit boahtte vahkku digáštallat dán dili. Lea vejolaš ahte Ruošša eiseváldit dohkkehit ahte dorvoohccit sáddejuvvojit ruovttoluotta girdiin, dan sadjái go bussiin Storskog-ráji badjel, Mátta-várjjagis.