- MIi eat leat šat doallan oktavuođa dainna ovddeš njelješ joavkkuin, deattuha NSR:a sátneguoddi ráđđádallamiin, Klemet Erland Hætta.
Son ii mieđit ahte sii seammás go šiehtadallet Bargiidbellodagain, maiddái doalahit oktavuođa dainna ovddeš doarjjajoavkkuin, mii sis leamaš Sámedikkis.
- Leamaš oktavuohta
Muhto Sámeálbmotbellodaga áirras Jánoš Trosten gal sáhttá muitalit eará go dan maid Klemet Erland Hætta mieđiha.
Go jearrat leago NSR.a leamaš oktavuođas suinna, de fástida ahte "dat leamaš moadde cizáža mat girddašit, muhto man dásis dat cizážat leat, dan in duođaš in duohko in ge deike".
Maiddái sámeálbmotbellodaga Terje Tretnes dovddasta ahte NSR:a leamaš suinna oktavuođas otne iđit, muhto ii muital man oktavuođas, ja man birra lei sáhka.
- Botket oktavuođa njelješ joavkkuin
Bargiibellodat dat lea gáibidan NSR:a botket buot oktavuođa dainna "njelješ joavkkuin" jus singuin gal ležžet jurddašan šiehtadallagoahtit.
NSR:a parlamentaralaš jođiheaddji Lene Hansen ii loga diehtit das maidege ahte NSR:a mahká leamaš oktavuođas Guovddášbellodaga Olaf Eliasseniin.
Hansen duođašta ahte NSR:a lea botken oktavuođa daid boares ovttasbargoguimmiiguin dál go Bargiidbellodagain leat šiehtadallamiin.
- Gii dalle gielista?
Nu šaddá ge eahpečielggas mii lea dáhpáhuvvamin, go Jánoš ja Tretnes duođašteaba ahte "lea oktavuohta" ja Klemet Erland Hætta gis behttala.
Jus Sámi Radio galggaš geahččalit tulkot dán dili, de orru hui čielggas ahte sihke Janoža ja Tretnesa dáhttu livčče ahte NSR:a ii lihkostuvašii Bargiidbellodaga šiehtadallamiin. Soai hálidivččiiga ahte dát boatkanivčče measta ovdal go lea álgán.
NSR:a ja Klemet Erland Hætta gal leat duođas čovdosiid ozus, ja lea sakka jáhkehahtti ahte sii dál geahččalit čorgadit meannudit Bargiidbellodaga oktavuođaiguin.
- Eai geargga beal-guovtti rádjai
Bargiidbellodaga šiehtadallanjoavkku jođiheaddji Marianne Balto Henriksen ii jáhke mákkár ge šiehtadusa gárvánit otnážii beal-guovtti rádjái.
