Vaikko duojáriid riikkaorganisašuvdna Sámiid duodji ii dieđe justa galle ástoáigge-duojára gávdnojit Norgga beal Sámi, de eai bala ástoáiggeduojáriid njielastit olles Sámedikki duodjebušeahta jus dal ožžotge doarjaga.
- Dás ii livčče sáhka eará go moadde čuohte duhtát ruvnnus. Sámi servvodat gal suitá dán, dadjá Sámi Duoji jođiheaddji Karl Fredrik Teigen.
- Smávva ruhta
Vaikko ii oktage leat kárten galle duojára leat norggabeal sámis, de ii jáhke Karl Fredrik Teigen ahte šattašii nu hirbmat divrras doarjut duojáriid geain ii leat sierra fitnodat ja geat eai beasa lassearvodivat registarii.
Son árvvoštá birrasiid 200 000 ruvnnu mávssašii symbolalaš doarjaga addit ruovtto-duojáriidda.
- Jus sii geat duddjojit birrasii 50.000 ruvnnu ovddes, oaččošedje logi proseantta, de ii leat stuorra ruhta. Dát lea dego gutni dáidda duojáriide, dadjá Teigen.
- Juohke nuppi dálus
Vaikko ii šattašii go moadde duhát ruvnnu juohkehažžii de sámediggevárrepresideanta Johan Mikkel Sara lea sihkar ahte moadde čuohteduhát ruvnnus ii leat doarvái:
- Sámi váldoguovlluin duddjojit juohke nuppi viesus. Dás sáhttá dalle šaddat oalle olu ruhta.
Sara ii jáhke Sámiid Duoji leat doarvái vuđđolaččat árvvoštallan dán árvalusa go eai dieđe galle duojára gávdnojit.
Čakčat leat duodje-šiehtadallet mas servet Sámediggi, Duojáriid Ealáhus searvi ja Sámiid Duodji. Jus ástoáigge-duojáriin galgá vejolašvuohta oba fitnetge doarjaga de ferte Ealáhussearvi doarjut árvalus. Sámediggi dáhttu oktasaš gáibádusa.
Ealáhussearvvis eai dáhto almmuhit dorjotgo dán árvalusa.
Várrepresideanta lohká imašin jus dát oba árvaluvvoge.
- Mu mielas lea hui ártet go vuos duojárat ieža čállet vuollái šiehtadusa Sámedikkiin ja de spiekkastit iešguđetge guvlui ja bohtet máŋggalágan signalat