Duohtavuođakomišuvnna čoahkkimat

Sámediggi bovde rabas čoahkkimiidda, main fáddán lea duohtavuođakommišuvnna mandáhta. Stuorradiggi lea mearridan ásahit duohtavuođakommišuvnna mii galgá iskat dáruiduhttinpolitihka ja vearrivuođa mii sápmelaččaid ja kvenaid vuostá lea dahkkojuvvon Norggas.

- Sámediggi lea ožžon bargun buktit cealkámuša Stuorradiggái duohtavuođakommišuvnna mandáhta birra.

Min mielas lea hui deaŧalaš ahte sámi álbmot beassá leat mielde váikkuheamen dán cealkámuššii. Mun doaivvun ahte ollugat atnet dan deaŧalažžan ja bohtet čoahkkimiidda minguin deaivvadit ja digaštallat mainna duohtavuođakommišuvdna galggašii bargat, čállá sámediggeráđi Henrik Olsen preassadieđáhusas.