Hopp til innhold

Dulkakonferánsa: – Sámit dárbbašit dieđuid iežaset vuoigatvuođaid birra

– Olu ásahusat Norggas leat ain dan dilis ahte dat eai dieđe bal juo maid ge sámi vuoigatvuođaid ja giellavuoigatvuođaid birra, lohká ovddeš sámediggepresideanta ja dálá Amnesty International politihkalaš ráđđeaddi álgoálbmotáššiin, Aili Keskitalo.

Son logaldalai dulkakonferánssas mii dáid beivviid lea lágiduvvon Oslos. Konferánssas lea geahčadan movt dulkonbálvalus lea nannejuvvon maŋŋá go ođđa láhkai bođii ođđajagis.

Eai buot sámit ge dieđe ahte sis lea vuoigatvuohta oažžut dulkka almmolaš oktavuođain.

– Dat lea eiseválddiid ovddasvástádus juohkit dieđuid sihke daidda geat galget fállat almmolaš bálvalusaid, muhto maiddái geavaheaddjiide, sápmelaččaide, nu ahte mii diehtit makkár vuoigatvuođat mis leat, lohká Keskitalo.

Son jáhkká ahte ON álgoálbmotgiellalogijahki ge sáhttá leat mielde fuomášuhttimin majoritehta álbmogii makkár dárbu lea dulkonbálvalusaide, ja ahte álgoálbmogiin leat dihto vuoigatvuođat beassat iežaset gielaid geavahit.

– Mon sávan mii sáhttit geavahit dan fuomášumi buorrin min gielladillái ja min giellavuoigatvuođaide. Muhto dađi bahát leat eiseválddit dego ovttagielagat. Dat eai riekta nagot oaidnit dan giella máŋggabealatvuođa, mii lea maiddái Norgga servvodagas, lohká son.

Aili Keskitalo
Foto: Mette Ballovara / NRK

Korte nyheter

  • Manná maŋás bellodatmihtideamis

    Bargiidbellodat manná maŋás bellodatmihtideamis, maid Norstat lea dahkan NRK ja Aftenposten ovddas. Go olbmuin jerret maid áigot jienastit suohkanválggas ja Stuoradiggeválggas, de manná Bargiidbellodat maŋás guvttiin proseantačuoggáin.

  • Oaččui Niehkostipeandda

    Guokte dáiddára Romssas ja Finnmárkkus oažžuba dan nu gohčoduvvon Niehkostipeandda, dahje dárogillii Drømmestipendet, maid Norgga Kulturskuvlaráđđi ja Norsk Tipping juolludeaba.

    Ja leaba guokte musihkkára, Elina Ijäs Guovdageainnus eret, ja Ingeborg Molund Skiervvás eret geat oažžuba 30.000 ruvnno goabbáge. Oktiibuot juhket Norggas 50 dákkár stipeandda, oktiibuot 1,5 miljovnna ruvnno.

    Samisk ungdomshelsekonferanse
    Foto: Håkon Mudenia / NRK
  • Reagere ruvkefitnodaga gávnnahusas

    Ruoŧa ruvkefitnodat LKAB almmuhii gieskat ahte sii leat gávdnan Eurohpa stuorámus gávnnahusa hárvves eananmetállain.

    Sii oaivvildit gávnnahusa leat dehálažžan ruoná nuppástuhttimii. Dasa reagere Ruoŧa Sámedikki Sámiid Riikkabellodaga politihkkár, Káren-Ann Hurri. Son dadjá ahte sámiin lea áibbas eará oaidnu ruoná nuppástuhttimii ja oaivvilda industriija ja politihkkáriid oamastan doahpaga ja dagahan dan márkanfievrridanvuohkin.

    -Sii eai leat daid metállaid ohcan buoridit planehta, dadjá Hurri.

    LKAB ges dadjá ahte sin bargu lea unnidit fossiillanuoskkideami, iige leat sin duohken mearridit mii ruoná nuppástuhttin lea, sii gullet dušše maid politihkkárat ja birasdutkit dadjet.

    – Jus háliida ođđaáigásaš ja buorre eallima mas alla čálgu, de leat konsekveanssat. Dasto mii fertet ohcat metállaid, dadjá LKAB mediahoavda Anders Lindberg.

    Loga olles ášši dás.