Normal

Duddjon sámi viessogálvvuid

Duodjemásterstudeanta Katarina Spik Skum váillahii sámi viessogálvvuid. Iežas duodjemásterčállosis Sámi Allaskuvllas lea son atnán goađi vuolggasadjin go lea duddjon ođđaáigásaš viessogálvvuid.

Sámi viessogálvvut

Gápmasiin sáhttá láhtteránu goarrut, ja bessiin fas čiŋahit beavddi.

Foto: Marie Elise Nystad

Sámi allalskuvlla dutkanbeivviid oktavuođas lei duodjemásterstudeanttas Katarina Spik Skumas čájáhus, gos čájehii iežas masterbarggu olbmuide. Son lea duddjon viessogálvvuid bistevaš ávdnasiin ja bázahusain.

Goahti lea leamaš vuolggasadjin su barggus, mas ulbmilin lei ráhkadit ođđaáigásaš viessogálvvuid.

Katarina Spik Skum

Katarina Spik Skum lea goađi atnán vuođđun iežas ođđaáigásaš viessogálvvuide. Dás čuožžu lásseliinniid guoras maid lea ráhkadan sisttis ja soagis.

Foto: Marie Elise Nystad

Gápmasiin ráhkadan láhtteránu

Son lea dán čavčča geargan másteroahpuin Sámi Allaskuvllas, ja mánnodaga besse olbmot oaidnit su barggu.

Son lea earret eará ráhkadan láhtteránu gápmasiin ja sisttis.

– Min guovllus Johkamohkis ii leat šat nu dábálaš atnit gálssohiid ja nuvttohiid, nu ahte dát gápmasat livčče mannan njuolga ruskaduvdnái. Mun hálidin loktet dáid ávdnasiid eará dillái, ja nu šattai dát láhtterátnu, lohká son.

Sisti, soahki ja beassi

Láseliinnid lea ráhkadan sisttis ja soagis, ja reŋkko ja beavddi fas soagis ja beassis.
Dasa lassin lean maid ráhkadan čohkkánseahka sisttis.

– Dá lea dego sacco-seahkka, dahje Fatboy, muhto lean hábmen dan veahá earáláhkái, ja gohčodan dan soggenin.

Sámi viessogálvvut

Katarina Spik Skum jurdda lea leamaš ráhkadit ođđa áigásaš viessogálvvuid duoji rámma siskobealde.

Foto: Marie Elise Nystad

Goahti

Katarina hálidii ráhkadit ođđaáigasaš dujiid bistevaš ávdnasiin. Mánnán lávii áhku ja ádjá mielde ealu luhtte, ja dalle orro goađis.

– Mun muiten dušše daid heajut beliid goahteeallimis, muhto go dán oahpu oktavuođas barggaimet Gilišiljus lavdnjegođiin, de ožžon eará oainnu dasa ja fuobmájin maid buriid belliid, dego ahte dat lea ekologalaš, ja ahte das šaddet olbmot hui lahkalaga.

Váillahii sámi viessogálvvuid

Beavdi

Dán beavdái mun lea viežžan inspirašuvnna guovtti goađis, nuppis ledje hui njulges ja čáppa muorat, ja dan mun dás lean geahččalan čájehit, lohká Katarina.

Foto: Marie Elise Nystad

Son muitala maid ahte lea váillahan viessogálvvuid mat leat sámi oaidninsajis ráhkaduvvon.

– Álggos go huksejin iežan ruovttu de osten dievva sámi inspirerejuvvon diŋggaid, muhto goitge lean dovdan ahte juoga lea váilon mii čájeha mu identitehta. Nu ahte dát bargu lea geahččaleapmi, lohká son.

Son lea visot dahkan ieš, viežžan ja dikšon ávdnasiid.

– Hui somás bargu lea leamaš, muhto maid hui lossat. Mun in leat muorraduojár, nu ahte juste diet bealli lea leamaš hástalus, muhto mus leat leamaš buorit bagadallit, lohká son.