NRK Meny
Normal

Davviromssa suohkanat dáhttot bissut sierra suohkanin

Buot davviromssa suohkanat leat mearridan bissut sierra suohkanin nugo dál. Muhtun suohkanat geahččaledje ohcalit ovttastahttima eará suohkaniiguin, muhto loahppaboađus šattai goitge bissut sierra suohkanin.

Storslett i Nord-Troms

Buot guhtta davviromssa suohkana leat mearridan bissut sierra suohkanin. Golmma suohkanis čađahedje álbmotjienasteami ovdal suohkanstivrraid mearrádusaid.

Ovddeš Ivgu

Ivgu, Omasvuotna ja Gáivuotna ledje ovdal okta suohkan. Stuora Ivgu suohkan juohkásii golmma suohkanin 1930:s, go Omasvuotna hálidii sierran. Ekonomalaš- ja mearridanváldi lei Ivgomuotkkis, ja dát lei okta váldoákkain manne Omasvuotna háliidii ásahit sierra suohkana. Dás ledje maid čearddalaš bealit sáhkan.

Dát golbma suohkana geahččaledje bargat ovttastahttimiin guokte maŋemus jagi, muhto Gáivuotna dieđihii árrat ahte jus galget ovttastahttot, de fertejit dat eará suohkanat maid šaddat oassin sámegiela hálddašanguovllus. Dán eai leat vuosttildan vuos, ii Ivgu iige Omasvuotna. Muhto suohkanstivrrat leat mearridan bissut sierra suohkanin goit vuos.

Golmma suohkanis álbmotjienasteapmi

Golbma davviromssa suohkana leat čađahan álbmotjienasteami oaidnin dihte movt ássit háliidit. Ráissas, Skiervvás ja Návuonas leat čađahan álbmotjienasteami oaidnin dihte maid suohkaniid ássit háliidit.

Skiervvás ja Návuonas badjel 90 proseanta jienasteddjiin hálidedje bissut sierra suohkanin. Ráissas lei badjelaš bealli jienasteddjin geat háliidedje bissut sierran.

Davvi-Romsa 4

Suohkanovttastahttinbarggus lei maid árvaluvvon ovttastahttit Gáivuona, Ráissa, Skiervvá ja Návuona, mii gohčoduvvo Davvi-Romsa 4. Ráissa suohkan čađahii ráđđeaddi álbmotjienasteami, gos boađus lei ahte eanetlohku hálida suohkana bissut sierran. Eai lean go 693 ráisalačča geat jienastedje. Ráissas leat 3982 olbmo geat sáhtte searvat jienasteapmái.

Návuonas ledje moadde ovttastahttinvejolašvuođa, Davvi-Romsa 4, ovttasdahttit Álttáin ja Guovdageainnuin.