Unjárgga gielddas orrot badjelaš 900 olbmo, doppe leat measta beali eambbo sávzzat go olbmot, gielddas leat 1523 sávzza.
2010:s fárrii Jernsletten bearaš Unjárgii nieguid ollašuhttit. Sii fárrejedje Tromssas Unjárgii ja álge sávzadoaluin. Dan rájes go álge dološsávzzaiguin, de lea čora sturron veahá. Álge 25 sávzzain, ja dál leat 50 dološsávzza lahka guotte.
Álkkes šibihat
Dološsávzzaiguin ii leat nu olu bargu. Oktii beaivái fitná Jorunn olgon geahččamin mo sávzzaiguin manná. Dasa golaha sullii tiimma. Go sávzzat leat meahcis, de son fitná 2-3 vahkkui geahččamin mo sis manná doppe.
Jorunn Jernsletten muitala ahte dološsávzzat leat hui álkkes šibihat, ja daiguin lea álki álgit. Olmmoš it dárbbaš nu stuorra ja ođđa náveha go álgit áigu.
– Mun ieš in háliidan geavahit nu olu ruđaid ođđa návehii, ja danne mun álgen ge dološsávzzaiguin.
Gokčá goluid
– Dán barggus ii leat tienas go leat dušše 50 sávzza, galggašedje juo leat 200 sávzza vai tienasin šaddá, muhto dat gokčá goluid, dát lea muhtin láhkai lassi tienas, muitala Jorunn.
Jorunn bargá veahá Isak Saba guovddážis, muđui son lea sávzaboanda ja duojár. Son ráhkada dujiid náhkis ja ullus. Jorunn isit lea Deanu ja Várjjatmusea siidda direktevra ja su tietnasa olis sii birgejit.
– Fertet liikot elliiguin bargat, ja leat olgon juohke beaivve, go dán barggus ii leat nu buorre tiibmabálká, čaibmá Jorunn.
Golbmii jahkái hui ollu bargu
Golbmii jahkái lea Jernsletten bearrašis ollu bargu.
– Miessemánus lea ollu bargu, go sávzzat leat guoddimin, dalle ferte birra jándora čuovvut mielde. Ferte geahččat ahte lábbát ožžot mielkki eatnis, ja jus eai oačču doarvái, de ferte addit liig mielkki lábbáide, muitala son.
Suoidnemánus lea maid olu bargu, ja dalle lea hui intensiiva bargu.
– Dalle lea áigi láddjet, nu ahte olbmos leat suoinnit dálvet. Ládju bistá moadde vahku, dadjá Jernsletten.
Golggotmánus lea áigi viežžat sávzzaid vulos meahcis vel beassá álgit njuovvat. Njuovvan bistá sullii vahku.
Darvánan muitui
Jorunn ii leat bajásšaddan sávzzadoalus, ja danne son muitá hui bures go vuosttaš háve šattai leat jortamovra.
Buorre biergu Unjárgga sávzzain
Unjárga lea njunnošis go lea sáhka buori bierggus, ja golmma buoremusaid searvvis leat leamaš jo olu jagiid.
Jorunn Jernsletten muitala ahte Unjárggas lea hui buorre dálkkádat, ja dainna sis lea hui buorre biergu doppe.
– Dáppe ii leat menddo báhkka, dáppe eai leat olu divrrit mat givssidit šibihiid, ja dáppe lea hui buorre guohtun, dadjá son.