NRK Meny
Normal

Dán áigge lohká alitohppui ruovttus

Máilbmi lea rievdan, ii dárbbaš šat vuolgit nu guhkás jos allaohppui áigu lohkat. Nina Margit logai fágaohppui ruovttus.

Nina Margit

Nina Margit lea giitevaš go iežas ruovttugielddas lei vejolaš váldit alitoahpu. Dál lea son geargan oahpuin, ja lea maid ožžon barggu.

Foto: Anne Olli

Unjárga lea gielda Nuorta-Finnmárkkus gos eai ása eanet go sullii 900 olbmo. Ovdal leat gieldda ássit ferten guođđit ruovttubáikki jos áigo alitoahpu háhkat alcceset. Dán áigge ii rievtti mielde dárbbaš guođđit ruovttu, dál sáhttá oahpu oažžut interneahta bokte lohkanguovddážiin olu guovlluin. Unjárgalaš Nina Margit lea lohkan sosialpedagogihka, organisašuvnna- ja jođihanohppu Vuonnabađas.

Lohkanguovddáš Vuonnabađas

Nesseby rådhus

Unjárgga ráđđeviesus Vuonnabađas dat lea Lohkanguovddás/Studiesenter gos sáhttá lohkat fágaid, ja váldit alitoahppu.

Foto: Máret Biret Sárá Oskal

Unjárgga gielddas lea lohkanguovddáš, dahjege studiesenter, Vuonnabađa gielddaviesus, ja doppe sáhttá lohkat vaikke makkáraš ohppui.

Dál fállá lohkanguovddáš ollu eará oahpuid maid. Earret eará sáhttá golmma jagis lohkat bacheloroahppui «Nyskaping og samfunnsutvikling». Sáhttá maid lohkat ekonomiija, pedagogihka ja dearvvasvuođafágaide Vuonnabađa lohkanguovddážis.

Ávkkálaš ásahus Vuonnabađas

Nina Margit lohká alcces lean dán oahppanfálaldaga erenoamážin, ja son lea giitevaš go beasai ruovttugielddas lohkat alitohppui.

Son ávžžuha earáidge váldit oahppu lohkanguovddážiid bokte, go dalle ii dárbbaš vuolgit nu guhkás. Ii son gal lean sáhttit vuolgit gosage dalle go válddii oahppu, danne go sus ledje skuvlamánát ruovttus. De sutnje gal lei dát lohkanguovddášfálaldat erenoamáš buorre.

Vuonnabađa lohkaguovddážis ođđa fálaldagat

Unjárgga gieldda ruovttusiddus lea dál olles ráidu oahppovejolašvuođain, maid sáhttá váldit lohkanguovddážis Vuonnabađas.

Doppe lea vejolaš váldit earret eará oahpaheaddjeoahpu, fitnodatekonomiijaoahpu, ja dearvvasvuođafágas máŋga iešguđetlágan oahpu. Ja sáhttá maid váldit ovdakurssa inšenevraohppui Vuonnabađa lohkanguovddážis.