Duodjeoahppi: - Measta dego lottos vuoitit

Inga Maybritt lea nuorra duojár guhte oaččui Tove Kingren stipeandda

STIPEANDA VEAHKEHA: Inga Maybritt Bongo illosii go gulai ahte oažžu duodjestipeandda. Dál lea vel stuorát vejolašvuohta ahte duodji šaddá su eallinláibin. GOVVIDAN/ČUOHPPAN: Felicia Löfgren

Inga Maybritt Bongo (26) lea nuorra duojár Guovdageainnus eret. Son ozai Tove Kingren stipeandda ja loahpageahčin 2014 oaččui diehtit ahte son lei ožžon stipeandda. Son oaččui 143 duhát kruvnna, ja ruđaid son áigu geavahit iežas fitnodahkii.

Inga Maybritt lea álo beroštan duojis ja oahpai duddjot iežas eatnis ja áhkus. Dál son studere duoji allaskuvllas Guovdageainnus, ja duddjo dadjat jo juohke beaivve.

Tove Kingren stipeanda

Stipeanda lea vuoruhuvvon olbmuide gaskal 18 ja 30 jagi geat duddjojit ja studerejit sámi duoji. Ohcci ferte maid leat riegádan Finnmárkku fylkkas ja leat sámegielat.

Diibmá stipeandavuoiti lei almmáiolmmoš, ja danne gálggai stipeanda juolluduvvot nissonolbmui dán jagi. Stipeanda juhkkojuvvui dán jagi goalmmát geardde.