Dutkanbeaivvit allaskuvllas: Manne boazoálbmogat eai bora njuovččageaži?

– Dat lea hui mávssolaš midjiide, lea hui buorre go dáppe olbmot besset gullat mii eará guovlluin dáhpáhuvvá. Ii leat buot mii lea nu oahpis midjiide, vaikko olu lea dat seamma, nugo bohccobiergu, muhto dat geavahuvvo iešguđetge láhkái. Dát lea dieđušge hui beroštahtti, lohká rektor Gunvor Guttorm.

Njuvvet gottiid

Stuora lávus olggo beal Diehtosiidda leat mánnodaga rájes leamaš iešguđetge lágán logaldallamat ja bargobájit gos borramuš lea leamaš guovddážis. Dáppe leat suovastuhttán biergguid, gullan eambbo loddenárbevieru birra, oahppan mot guollevuodja lea mearraluosas ja oahpásnuvvan eará árktalaš eamiálbmogiid borramuškultuvrraide.

Alena Gerasimova lea boahtán Yakutias Ruoššas muitalit iežas álbmoga eveaŋggaid borramuš kultuvra birra. Son dadjá ahte sis lea bohccobiergu guovddážis, muhto ahte sii njuvvet gottiid, eaige iežaset bohccuid. Dain sii bohčet mielkki.

– Mii eanaš vuoššat bohcco bierggu, muhto vuoivasa ja ađđamiid, daid mii borrat njuoskkas naga.

Oahppan ođđa vugiid

Máret Rávdna Buljos lea borranbáiki Lodegis Nordlánddas, ja sus lea erenoamáš beroštupmi árbevirolaš borramušaide. Su mielas lea leamaš miellagiddevaš čuovvut bargobájiid dáid beivviid

– Mun lean oahppan ođđa vugiid mot ráhkadit biepmu go dan maid odne barggan, daid mun áiggun geahččalit ieš go ollen ruoktot.

Eai bora njuovččageaži

Alena lea dahkan ovtta fuomášumi daid beivviid, nammalassi dan ahte ii oktage boazoálbmogiin bora njuovččageaži.

– Mii buohkat dan čuohppat eret. Manne nu lea, dan ii sáhte oktage vástidit. Guovlluin leat iešguđetge lágán čilgehusat dása, muhto dát leat dušše diiddat. Dat livččii olles dutkanprošeakta, lohká son.