NRK Meny
Normal

Dutkanbeaivvit allaskuvllas: Manne boazoálbmogat eai bora njuovččageaži?

Sámi allaskuvlla dutkanbeivviin Guovdageainnus lea borramuš fáddán. Bargobajiid ja logaldallamiid bokte leat olbmot beassan oahpásnuvvat eambbo árktalaš eamiálbmogiid borramuškultuvrraide.

Forskningsdager på Samisk høgskole i Kautokeino.

– Dat lea hui mávssolaš midjiide, lea hui buorre go dáppe olbmot besset gullat mii eará guovlluin dáhpáhuvvá. Ii leat buot mii lea nu oahpis midjiide, vaikko olu lea dat seamma, nugo bohccobiergu, muhto dat geavahuvvo iešguđetge láhkái. Dát lea dieđušge hui beroštahtti, lohká rektor Gunvor Guttorm.

Gunvor Guttorm

Sámi allaskuvlla rektor Gunvor Guttorm lohká ahte duktanbeivviin sii hálidit čatnat oktii árbevirolaš dieđu ja dieđalaš dieđa.

Foto: Marie Elise Nystad

Njuvvet gottiid

Stuora lávus olggo beal Diehtosiidda leat mánnodaga rájes leamaš iešguđetge lágán logaldallamat ja bargobájit gos borramuš lea leamaš guovddážis. Dáppe leat suovastuhttán biergguid, gullan eambbo loddenárbevieru birra, oahppan mot guollevuodja lea mearraluosas ja oahpásnuvvan eará árktalaš eamiálbmogiid borramuškultuvrraide.

Lávus logaldallan

Alena Gerasimova čájehii mot sii Yakutias earret eará geavahit šattuid biepmun.

Foto: Marie Elise Nystad

Alena Gerasimova lea boahtán Yakutias Ruoššas muitalit iežas álbmoga eveaŋggaid borramuš kultuvra birra. Son dadjá ahte sis lea bohccobiergu guovddážis, muhto ahte sii njuvvet gottiid, eaige iežaset bohccuid. Dain sii bohčet mielkki.

– Mii eanaš vuoššat bohcco bierggu, muhto vuoivasa ja ađđamiid, daid mii borrat njuoskkas naga.

Oahppan ođđa vugiid

Máret Rávdna Buljo

Máret Rávdna Buljo mielas lea leamaš miellagiddevaš oahppat ođđa vugiid mot ráhkadit biepmu.

Foto: Lasse Østmo

Máret Rávdna Buljos lea borranbáiki Lodegis Nordlánddas, ja sus lea erenoamáš beroštupmi árbevirolaš borramušaide. Su mielas lea leamaš miellagiddevaš čuovvut bargobájiid dáid beivviid

– Mun lean oahppan ođđa vugiid mot ráhkadit biepmu go dan maid odne barggan, daid mun áiggun geahččalit ieš go ollen ruoktot.

Eai bora njuovččageaži

Alena lea dahkan ovtta fuomášumi daid beivviid, nammalassi dan ahte ii oktage boazoálbmogiin bora njuovččageaži.

Alena Gerasimova

-Galggašii measta duktat manne ii oktage boazoálbmogiin bora njuovččageaži, lohká Alena Gerasimova.

Foto: Marie Elise Nystad

– Mii buohkat dan čuohppat eret. Manne nu lea, dan ii sáhte oktage vástidit. Guovlluin leat iešguđetge lágán čilgehusat dása, muhto dát leat dušše diiddat. Dat livččii olles dutkanprošeakta, lohká son.