Máilmmi boarraseamos olmmoš lea jápmán

Bolivia álbmotregistara mielde Carmelo Flores Laura lei 123-jagi boaris go son ikte jámii. Jápmima birra muitalii Cecilio Flores, su áidna mánná gii ain lea eallimin.

Evo Morales ja Carmelo Flores

Bolivia presideanta Evo Morales lei boahtán deaivvadit Carmelo Floresii diibmá čavččat Andi-várrai.

Foto: Juan Karita / AP

Aymára-indiána guhkes eallima duohken ledje dearvvaslaš eallindábit. Son lávii vázzit olu ja borrat dearvvaslaččat. Son ii goassege borran pástta iige riseniid, muhto baicca bivggi.

Son suoskkai olles iežas eallinagi kokamiesttalasttaid, maid lea lohpi šaddadit ja geavahit olu guovlluin Mátta-Amerihkás.

Eamiolbmot jáhkke ahte kokalasttat buoridit ja dálkkas buohcceolbmuide ja dan lei hui dábálaš geavahit sin gaskkas. Maiddai Bolivia presideanta Evo Morales lea aymára-indiána ja lea ovddeš kokamiesttašaddadeaddji.

Maŋimuš áigge de ii nagodan máilmmi boarraseamos olmmoš šat vázzit, juolggit ledje heajut. Boaresvuohta dagahii ahte Carmelo ii šat nagodan čuoččut go juolggit ledje visot bohtanan, Doaktárat leat muitalan ahte diabetes dahje sohkardávda dáidá leat okta sivain go ii šat nagodan lihkadit.


Dát eallilan indiána orui agibeaivve Andi-váriin Frasquia-gilis badjel njeallje kilomehtera allodagas Titicaca-jávrre gáttis. Media lea čállán su leamen máilmmi boarráseamos olmmožin.

Galdut: Telegraph, news.com.au