Boanddat leat dolkan vuordimis Hold Norge Rent ruskaviežžanbiilla mii diibmá juo galggai viežžat ruovdešlámbariid sis.
- Dál de galget šlámborat vižžot, lohpida Hold Norge Rent prošeaktajođiheaddji Hilde Reitan
- Illuda muitala viežžama
- Lean ilus go dál beasan muitalit ahte leat fidnen Masternes Metallco ASa viežžagoahtit Finnmárkku boanddaid ruskkaid dalán go ožžot báhpáriid mat muitalit gos ruskkat galget vižžot. Fitnodat sáhttá vuossárgga rájes juo viežžagoahtit, lohka prošeaktajođiheaddji Reitan.
- Vuordán badjil jagi
Giđđat muitalii Sámi Radio boanddaid birra geat leat badjil jagi juo vuorddašan Hold Norge Rent ruskaviežžanbiilla.
Sii han leat čohkkedan ruovdešlámboriid geaidnoguoraide ja dát gubát leat váivašuhttán ollu olbmuid.
- Buorre go jirbme
Finnmárkku Boanddaid Searvvi jođiheaddji, Fred Johnsen lea ilus go boanddaid ruskat viimmat vižžojit, muhto lohká ahte Mastenes juo diibmá fálai bálvalusaid Hold Norge Rentii, muhto dalle eai fuollan go lohke Masternesa gilvaleaddjin.
- Mun lea hui duhtavaš go viimmat jirbme, lohká Johnsen
- Ii leat dienas
- Mii leat bidjan olu návccaid gávdnat fitnodaga mii sáhtašii čohkket ja fievrridit dákkár ruvddiid Finnmárkkus.
Goluid, nugo ringengoavddáža jođiheapmai ja áŋggiruššamii, daid mii gal fertet ieža máksit, nu ahte eat mii dine eat evrege dáinna, lohká Reitan.
- Geargan juo Juovlavuonas
Johnsen lohká Masternesa fitnan jo Juovlavuonas ovdal go šiehtadus dahkkui.
- Doppe gal leat čorgen buot ruovderuskkaid nu ahte guovlu lea fas čáppat , ja jáhkán Masternesa nagodit čorget maiddái eara sajiid seamma bures, lohká Johnsen.