Movt seailluhit sámegiela ja kultuvrra mediamáilmmis?

NRK Sápmi ohcála veahki álbmogis movt galgá olahit sin buorebut otná viiddis mediamáilmmis - dása sávvamis oažžut vástádusa ihttá konferánssas.

Sami-konferanse

Mii diehtit ahte sámegielat leat báhcigoahtán geavakeahttá beaivválaš dilis. Odne gávdnojit nu olu iešguđetlágan mediafálaldagat maid maiddái sápmelaččat válljejit ovdalii sámi fálaldagaid. Movt de nagodit áimmahuššat ja seailluhit sámi giela, identitehta ja kultuvrra?

Mona Solbakk

NRK Sámi hoavda, Mona Solbakk háliida álbmogis veahki das movt galggašii seailluhit ain buorebut sámi giela ja kultuvrra viiddis mediamáilmmis.

Foto: Privat

Olu mediat mat geasuhit maid sápmelaččaid

NRK Sámi hoavda Mona Solbakk deattuha ahte dálá mediamáilmmis gávdnojit nu olu fálaldagat ja maiddái sápmelaččat válljejit eará fálaldagaid go dušše sámi TV- ja radioprográmmaid.

– Movt sáhttá sámi media loktet eanet beroštumi sámiide ahte čuovvut sámi fálaldagaid, dán doaivumis oažžut vástádusa ihttá konferánssas, jáhkká Solbakk.

Solbakk deattuha ahte sámi álbmot ferte cavgilit ahte leago miige maid ferte rievdadit nugo sámi mediaásahusain, vai šaddá eanet gelddolažžan válljet sámi fálaldagaid. Dát lea maid veahkkin NRK Sápmái hábmet boahtteáiggi fálaldaga.

Susanne Amalie Andersen skal lede Noereh!

Guovtti máná eadni, Susanne Amalie Langstrand-Andersen fuomášii ahte ferte duođai sámástišgoahtit go oaččui vuosttaš máná, ja nu lea joatkán maŋŋel go nuppi máná oaččui. Dál soai sámásteaba gaskaneaskka.

Foto: Karen Inger Lise Anti / NRK

Ealáskahtii gielas go oaččui vuosttaš máná

Susanne Amalie Langstrand-Andersen (33) oaččui vuosttaš máná golbma jagi dás ovdal. Dalle fuomášii ahte ferte sámástit iežas mánáin, vai mánná oahppá eanet sámegiela go son ieš. Nu son lea joatkán maid maŋŋel go nuppi máná oaččui.

– Mánáguovttos dál sámásteaba veaháš, ja orru ahte mu giellarahčamuš lea ávkkuhan, dadjá Langstrand-Andersen.

Dál sávvá son ahte NRK Sápmi ásaha appa mas lea álki mánáide gávdnat mánáid-tv ja eará mánáidprográmmaid sámegillii.

– Dát dagahivččii ahte eanet mánát čuovoše sámegielat mánáidprográmmaid, jáhkká guovtti máná eadni Susanne Amalie Langstrand-Andersen. Ihttin son ságasta konferánssas.