Dan son lohká go Guovdageainnu Sámediggeáirras Klemet Erland Hætta, ii šat hálit doarjut ja orrut Rica Hotelles.
Hætta oaivvilda Rica fitnodat lea privatiseren Sápmi nama iežas márkanfievrrideami oktavuođas, ja nu hálida garvit dan dás rájes.
– Váldá áinnas gussiid
Turi, gal lohká áinnas váldit Norgga sámiid riikasearvvi 18 politihkkára iežas idjádanbáikái go leat čoahkkimiin Kárášjogas.
Klemet Erland Hætta ii šat gáro idjádit Rica hoteallas, Kárášjogas, mainna Sámedikkis lea šiehtadus ja gos buot áirasat orrot go leat Sámedikki čoahkkimiin.
Hætta ii loga movtege riektan go Rica, mii lea riikkaviidosaš fitnodat, máŋggaid jagiid juo lea geavahan Sápmi namáhusa turisttafitnodagas, mas leat mieldeeaiggádat.
Ávkin Kárášjohkii
Sápmi lea olles Sámi opmodat, lohka son ja lohka dán namáhusa geasuhit eatnasiid Kárášjohkii, mii ii leat buorre eará sámi báikkiide.
NSR čájehii jagis 2000:is vuosttehagu jo dákkáraš privátiseremii ja maiddái Sápmi namáhussii. Hætta ii leat vel gal ávžžuhan iežas riikasearvvi hilgut Rica Hotealla, vaikko ieš dahká ge dan.
– Ii leat eará go Rica
Ášši ii leat vel dán radjai ságastallon NSR:as, muhto joavkku jođiheaddji Sámedikkis, Randi Skum dajai ikte ahte ii oainne eará idjádan vejolašvuođaid alcceseaset go báikki hotealla.
