Nu muitala romsalaš Eva Dons, gii 2014:s buohccái čižžeborasdávddain.
Dien áigge rievddai Evas sihke eallin- ja jurddašanvuohki. Divššudettiin čálligođii son beaivegirjji dovdduid, jurdagiid ja vásáhusaid birra.
Dál čájeha Sámi Našunálateáhter su beaivegirji teáhterbihttán.
Massii isida borasdávdii
«Imaštalan» čájeha gehččiide makkár jurdagat ja vásáhusat buohcceolbmos sáhttet čuožžilit. Maddai makkár doaivaga divššudettiin sáhttá oažžut.
Dattetge ii leat «Imaštalan» ođđa teáhterbihttá.
Originála namma lea «Undre mæ på» ja lei oaidnimis 2018:s ja dalle nevttii Eva ieš. Muhto dán vuoru doaibmá son bagadallin ja Mary Sarre neavttaša.
Mary diehtá olu borasdávdda birra, sihke movt lea buohcat dainna ja leat oapmahaš.
Su buoremus olmmái jámii borasdávddas 19-jahkásažžan. Dasa lassin massii son 16 jagi dás ovdal iežas isida borasdávdii.
Imaš ártet man olu gorut nákce
Hárve gulat ovttage positiivvalaččat hupmame borasdávdda birra, muhto Eva háliida teáhterbihtás čalmmustahttit dan beali maid.
Eva deattuha ahte vaikko teáhterbihtás lea duođalaš fáddá, de das goitge lea humora ja iešironiija.
– Don fertet birget iežat krisas, jus illá orot birgehallame bákčasiiguin ja ahte it leat šat oaidnit dego ovdal, dadjá Eva.
Son oaivvilda ahte go ieš dohkkehat dan, de sáhttá earáide maid geahppasit dan dohkkehit.
– Mii eat birge eallima čađa jus ii leat humor ja buorremiella, dadjá Eva.
Maiddái Mary dovdá bures ironiija maid oažžu dakkár dilis.
– Olmmoš ii sáhte dušše moraštit, čierrut ja suhttat. Dus leat maid buorit beaivvit go sáhtát suohtastallat ja reaškit.
Váttes fáddá
– Bihttá rievtti mielde lea mu čižžeborasdávdda birra, muhto seammás lea maid eallinkrisa birra, dadjá Eva.
Borasdávda lea fáddá man birra lea váttis hupmat ja lea čađat áigeguovdil.
– Dat lea juohkehačča duohken movt hupmá dan birra. Soapmásiin lea dárbu hupmat, earáin fas soaitá dárbu bidjat sániid dakkár dillái, dadjá Eva.
Son diehtá maid bures ahte sápmelaččat eai huma ráhpasit buozalmasvuođaid birra.
Danin oaivvilda ahte teáhter lea buorre arena, gos gullat ja vásihit dan.
Sávvá gehččiid čierrut ja reaškit
Mary muitala ahte sutnje lea dego dálkkas leamaš bargat dainna, vaikko muhtomin šaddá váivi maŋŋel go bargobeaivi nohká.
– Mun jáhkán ahte sápmelaččaide soaitá buorre oaidnit dan. Mun saván ahte olbmot dustet dan váldit vuostá. Dustet čierrut ja reaškit, dadjá Mary.
«Imaštalan» vuosttaščájáhus lea Guovdageainnus čakčamánu 2. beaivve. Dán mánu mielde fitnet čájálmasain Olmmáivákkis, Heahtás, Álttás, Ohcejogas, Anáris, Girkonjárggas, Vuonnabađas, Kárášjogas ja Romssas.