NRK Meny
Normal

Bargá doalahit identitehta heakkas

Kvena instituhta dán mánu kvena lea eret Bissojogas ja son geahččala doalahit iežas álbmoga identitehta heakkas. Dan son dahkká sániid bokte.

Kvenske ord
Foto: Arne Ivar Johnsen / Nrk

Tore Høybakken

Tore Høybakken

Foto: Arne Ivar Johnsen / Nrk

Kvena instituhtta Bissojogas Porsáŋggus vállje juohke mánus ovtta kvena gii instituhta mielas ánssáša gullot iežas dehálaš barggu dihti. Dán mánu kvena lea Bissojohkalaš Tore Høybakken danin go son leamašan mielde álggaheamen "kvenin sanat/kvena sánit" facebook joavkku juoga mii lea ávkin buohkaide geat hállet dahje geahččalit oahppat hállat kvenagiela.

Ii son dán gal lean vuordán

Bissojohkalaš Tore Høybakken gal ii lean vuordán beassat gohččoduvvot dán mánu kvenan. Son lohká ahte servvodagas leat olbmot geat barget deháleappot bargguid go maid son dahkká. Sin gaskkas han leat olbmot geat leat ráhkadan filmmaid kvenaid birra, soapmásat leat ges jorgalan lávlagiid kvenagillii ja vel earát leat čállán girjjiid ja oahppogirjjiid. Ii han Tore Høybakken gal lean rehkenastán beassat gohččoduvvot dán mánu kvenan gal.

Dušše moadde minuhta beaivvis

Tore hállá kvenagiela mii lea su eatnigiella muhto dan son ii sáhte dahkat eanet go dušše moadde minuhta beaivvis danin go eai han šat gávdno gallis geat máhttet kvenagiela. Son lohká vel ahte ollugiin lea dat oaivil ahte kvenagiela ii berre hállat seamma lánjas gos earát leat geat eai máhte kvenagiela. Dán láhkai han giella oalát jávká lohká Tore Høybakken.

Dáhppáhuvvá juohke mánus

Merethe Eidstø Kristiansen

Mereth Eidstø Kristiansen

Foto: Arne Ivar Johnsen / Nrk

Kvena instituhtta čállá juohke mánus smávit artihkkala kvenaid birra ja ulbmilin dainna lea dovddusin dahkat sin geain birra olus ii gullo. Son gii beassá leat mánu kvenan sáhttá leat dáiddár, son sáhttá leat vaikke gii eará ja sáhttá maid leat olmmoš gii bargá dahje lea bargan kvenagielain dahje kvena kultuvrra ovddas lohká Kvena instituhta giella- ja kulturmielbargi Merethe Eidstø Kristiansen.