NRK Meny
Normal

Banána lei guhká sus mikrofuvdnan

Ruovttus son hárjehalai vuoktasmarvenruvddiin ovdal go fuomášii váhnemiid rámbuvrras lávlut. Doppe son guoimmuhii rámbuvrra gussiid guhká, banána mikrofuvnnain.

Marit Hætta Øverli Studio Sámis

Marit Hætta Øverli Studio Sámis.

Foto: NRK

Son álggii lávlut measta ovdal go oahpai hállat, ain juo nu guhká go ieš muitá. Mázelaš Marit Hætta Øverli beasai lávddi ala lávket vuosttas geardde logi jahkásažžan ja lea vissa dan dahkan oalle máŋgii dan rájes.

Øverli lei mielde Máze Nieiddat-joavkkus 1970-logus ja nu álggii su musihkkakarrieara. 1991 vuittii son Sámi Grand Prixa šuoŋan Jáddá go beaivi, man Issát Sámmol Hætta čálii.

Konseartaeahket NRK Sámis

Juovlamánus 2015 lávkii Øverli Studio Sámi lávddi ala Máret joavkonamain, mii lea ovttasbargu su ja musihkkára Klemet Anders Buljo gaska.

Otne lea dus vejolašvuohta dán konseartta gullat bearjadatrádiokonsearttas tii. 16:30 NRK Sámi Rádios. Dán tiibmosaš sáddagis fállat mii maid artistajearahallama Máret duoin.

Klemet Anders Buljo

Klemet Anders Buljo čuojaha Máret duos.

Foto: Johan Ante Utsi / NRK

Soai leaba guhká ovttasbargan musihkain, muhto maŋimuš jagi leaba soai johtán fárrolaga dávjjit go goassige ovdal ee. Cubas.

Ii guldal earáid musihka

Mánnán Máze artista čáppášii Anita Hegerland lávlunjiena, muhto ii loga alccesis makkárge ovdagovaid. Son ii hálit ahte earáid musihkka váikkuha su musihkkii man ge láhkai.

– Mun in duostta guldalit nu issoras olu eará musihka. Go mun háliidan ahte mus dat alddán vuolgán dat musihka maid moai Lemet Ánddiin ráhkadetne.

Máret duo Studio Sámis

Máret duo Studio Sámis.

Foto: NRK

Šattai go miella gullat makkár Máret - musihkka lea? Na álggat don ge vahkkuloahpa musihkka návddašemiin NRK Sámi bearjadat rádiokonsearttain.