Bálkkašupmi giellaáŋggirdeaddjái
Porsáŋgulaš Agnes Eriksen ja Eira Søderholm, gii lea eret Suomas, oaččuiga gieskat kvena giellabálkkašumi. Lea vuosttaš geardde go Norgga giellaráđđi juohká bálkkašumi olbmuide geat barget ealáskahttit kvenagiela mii illá šat gullo. Agnes Eriksen lea guhká bargan kvenagielat oahpaheaddjin Leavnnja mánáidskuvllas ja son lea earret eará čállán girjjiid kvenagillii mánáide. Eira Søderholm lea ges bargan kvena- ja suomagielain Tromssa universitehtas - Norgga árktalaš universitehta 1983 - 2016. Son lea maid čállán kvena grammatihka mii lea stuorra ávkin ovdánahttimis kvena čállingiela. Bálkkašupmi lea 25.000 n.kr. maid soai gaskaneaset juohkiba. Dás gulat Agnes Eriksen` bálkkašumi juohkimis Tromssa universitehtas - Norgga árktalaš universitehtas gieskat.