– Dat aj sjaddá luondulasj æjvvalimsadje ietjá sáme dåjmajda dagu duodjekursajda, giellakursajda ja nav. Dav javllá sámedikkeájras ja guovte mánáj ieddne, Miriam Paulsen.
Dille Bådådjon uddni la gáktsa máná oadtju sámegielfálaldagáv dáro mánájgárden.
15 oahppe vuodoskåvlån gadtsi sámegielåhpadusáv. Oahppe li moattet skåvlåjs suohkanin.
Duodden la Bådådjo suohkanin åvdåsvásstádus julevsámegiela guhkesåhpadimes Vuonan, aktse oahppijda vuodoskåvlån.
– Bierri buoreduvvat
Miriam Paulsen ij la ållu dudálasj mánájgárddefálaldagájn gåktu dat uddni le.
– Måj lin sámegielåhpadusáv mánájdiskájda válljim, valla fálaldahka ij la buoremus dan diehti gå li avta galla bargge ja sáme máná li moatten åssudagájn. Jergalasj la gal tjoahkkit divna avta åssudahkaj, javllá Paulsen.
Nordlánda oajvvestáda suohkanoajvve guorras Paulsena oajvvadussaj, ja rámmpu gå oajvvadus boahtá..
– Dát la buorre oajvvadus ja mij hálijdip ságastit sáme birrusijn dán birra gå midjij boahtá dát gatjálvis, javllá Bådåddjo suohkanoajvve Ole Henrik Hjartøy.
