(Avvilis: Kaija Länsman, Yle Sápmi) – Dát ođđa girdihápman lea dál beali stuorát go mii mis dáppe lei ovdal. Mearkkašahtti lea dát feaskkir ja dieđusge ođđa «Check In»-báiki. Maiddái dorvodárkkástus lea áibbas ođđa, muitala Finavia fitnodaga Lappi guovlluhoavda Martti Oinas.
Gárži ii goit galgga leat šat Avvila girdihápmanis. Vaikko skruvejit ja basset ain, de gaskavahku rájes Avvilis mátkkošteaddjit besset beali stuorát girdigietti bokte vuolgit ja boahtit.
– Buoret dienasvejolašvuohta
Anárlaš drošševuoddji navdá stuorát terminála buktit lasi dienasbihttá goit Anára girkosiidii.
– Sihkkarit addá dietnasa. Kiinnálaččat leat dán áiggi olu ja sii bohtet juste fal Anárii. Turisttaid mearri sihkkarit lassána boahttevuođas, lohká drošševuoddji Soili Arrela Daveriikkalaš sámi TV-ođđasiidda.
Girdihápmana viiddideapmi ja divodeapmi máksá oktiibuot 13 miljon euro dahje sullii 109 miljon ruvnnu. Skábmamánus galgá visot leat gárvvis.
Vaikko dál guorus leage, de Avvilis lea leamaš váttisvuohtan juovlaáigi, go dalle šávihit olgoriikalaččat dievva ja devdet juohke saji.
Ealáhushoavda dadjá, ahte dál bargagohtet dan ovdii, ahte dát sajiid čađa johtet eai dušše juovllain, muhto birra jagi.
– Mii leat bastán vuovdit skábmaáiggi ja dan seavdnjatáiggi. Dál ferte bastit vuovdit giđđadálvvi ja geasi. Dalle oažžut lasi girdijohtolaga deike, lohká ealáhushoavda Janne Seurujärvi.