Dan dadjá TIL-čiekči ja ovddeš Sámi riikkajoavkku čiekči Tom Høgli NRK Sápmái maŋŋel go son dustii oalle čábbát ja gávvilit máilmmenástti Cristiano Ronaldo mannan lávvordaga, go Norgga riikkajoavku deaivvadii Portugalain.
Ávžžuha fárret
Norgga riikkajoavkku hárjeheaddji Egil Drillo Olsen gal rávve Tom Høgli geahččalit proffaeallima.
– Fárre fal! Høglis lea kapasitehta čiekčat stuora ligain. Eatnasiin lea mihttu ja hástalussan beassat stuora ligaide, nu sihkkarit lea maid Tom Høglis, lohká Olsen.
Tom Høgli čuovvola buori muddui Drillo rávvaga.
– Livččii miellagiddevaš
– Eahpitkeahttá livččii dát miellagiddevaš, jus dohkálaš fálaldat boađášii, lohká Høgli.
Go Tom Høgli ii diktán mannan lávvordaga Portugala nástti Cristiano Ronaldo láhttet nu go láve, de leat olu Eurohpá buoremus joavkkut fuobmán man gievra ja snáhpis Høgli lea. Høgli lohká ahte son ii ovdalgihtii ballan, vaikko diđii man buori čiekči galggai deaivat.
– Ronaldo lea erenoamáš buorre čiekči, muhto mun geahččalin nu ahte in jurddaš dan birra go mannen šilljui čiekčat, lohká Høgli.
Odne čiekčá ges Tom Høgli ja Norgga riikkajoavku Litauen vuostá.
