Ruošša dorjon stuibmideaddjit Nuorta-Ukrainas julggaštedje otne áigomušaid ásahit sierra stáhta, mas Donetsk lea oaivegávpot. Ođđa stáhta ásahuvvo maŋŋá go guovllus lea dollon álbmotjienasteapmi ja namma šaddá Malorossija. Namma mearkkaša Unna Ruošša, ja dát namma geavahuvvui ovdal masá olles Ukrainai. Ii vurdo, ahte nu galle riikka dorjot dan ođđa stáhta ásaheami.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.