Eurohpá Uniovnda lea ráhkadeame ođđa láhkamearrádusa šibit-njuovvama birra.
Dan oktavuođas árvvoštallá EU váldit vuhtii juvdálaččaid ja musliimaid njuovvanvieru, mas ealli galgá leat heakkas, iige jámálgahtton, go čuhppet čoddaga rastá.
Eurohpa šibitdoaktáriid-searvi gal ii dohkkehiivčče ahte ealli gottahallá ovdal go dat lea jámálgahtton.
- Bidnašuhttá elliid
Šibitdoavttir Elisiv Tolo lohká elliid bidnašuvvvat ja čujuha 90 jagi boares eliidsuodjalusláhkii mii gieldá dákkár goddinvuogi Norggas. Elisiv Tolo ii loga das erehusa, ahte goddo go ealli makkárge oskku dahje vieru mielde, go dat goitge gillá liikká ollu.
Muhto EU árvvoštallá dál dán gildosa Olmmošvuoigatvuođaid ektui, gos artihkkal 18 cealká ahte juohke olbmos lea riekti daguide ja vieruide mat čuvvot oskku.
Sáhkohallan
2003:s sáhkkohalai Riddu Riđđu festivála go Mongolia guossit njuvve sávzza árbevirolaš vuogi mielde.
Sii čuhppe čoddaga rastat, rahpe ratti ja gieđain čárveje váimmu eret.
Illuda go árbevierru vuoitá
Riddu Riđđu beaivválaš jođiheaddji Henrik Olsen lohká EU árvvoštallama buorren ja sávvá ahte dat váikkuhivččii Norgga elliidsuodjaluslága, nu ahte árbevirolaš njuovvanmáhttu dohkkehuvvošii lobálažžan.
Muhto šibitdoavttir ii loga váldit vuhtii etihka ja politihka dán oktavuođas. Son lohká elliid medisiinnalaš dilálašvuođa mearrideaddjin go galgá árvvoštallat movt goddit ealli.