(Jearahallan vuolemusas)
Soahpamuš lei ahte sápmelaččat galge golbma jagi oahpahit boazodoalu Alaskas. Si ožžo duhát ruvnnu bálkán mánnui, dasalassin nuvttá bipmu, orruma, doavtter ja bátnedivššu. Ja de vel nuvttá mátki ruovttoluotta Sápmái.
Eai buohkat máhccan Norgii
Dihtosis lea ahte muhtimat dáin olbmuin bisánedje dokko, ja dáin olbmuin leat maŋisboahtit doppe. Ja go ČálliiLágadus almmuhii sámegillii girjji "Sámit bálvalusas Alaskas "Ámerihkká breavat", de bođiige jearaldat goas dát girji jorgaluvvo eaŋgasgillii.
Lágádus jorgalahtii girjji eaŋgalasgillii
Jorgaleaddji Kaija Antonen jorgalii sámegielgirjji eaŋgalasgillii. Girjjji váldosisdoallun leat reivvet maid sápmelaččat čálle Ámerihkkás 100 jagi áigi. Erenoamážat leat dat reivvet maid sii čálle ruoktot Nuortanáste aviissa bokte. Muhtmat gal dieđos čálle njuolgga iežaset olbmuide, muhto reivvet mat Nuortanasttis almmuhuvve, dat šadde reivven buot sápmelaččaide geat lohke Nuortanaste.
Lágádus prentehii girjjiid Ámerihkkás
ČálliidLágádusa beaivválašjođiheaddji John Trygve Solbakk lohká iežaset fuomášan ahte ii gánnihan Norggas prentehit girjjiid, ja de sáddet daid nuppebeallái Atlanterábi. Lei hálbbit prentehit girjjiid Ámerihkkás danne go dalle eai dárbbašan máksit sáddengoluid. Dien fuomášedje ČálliidLágádusas dalle go Johan Turi girjji jorgaledje eaŋgalagillii, ja sáddejedje muhtin oasi girjjiin Ámerihkkai. Dalle lei sullii seamma divrras sáddet girjjiid Ámerihkkái go prentehit daid.