Almmuheaba sámegiel oahppogirjji vaikko eaba máhte giela

Mii leat Ruošša bealde Lujávrris. Johgáddái leat ceggejuvvon guokte lávu.

Dáppe ovdanbukto ođđa gielddasámegiel mánáid oahppogirji.

Dan leaba veahkkálagaid čállán Jelena Jakovleva ja Marina Grinčuk. Ii goabbáge hálddaš gielddasámegiela.

– Moai máhtte čállit, muhto ean hállat, čilgeba lujávrilaš nissonolbmo guovttos ruoššagillii.

• Loga: Viimmat digitála sátnegirji gielddasámegillii

– Boahttevaš buolvvaide

Girjjis leat olu čáppa ja ivdnás govat, maid Grinčuk lea sárgon. Teavsttaid ja bargobihtáid lea Jakovleva čállán.

Soai leaba beannot jagi bargan gárvvistit ođđa oahppogirjji.

Jakovleva lea fitnodatdoalli ja ovddeš sámepolitihkkár. Grinčuk lea dovddus duojár ja juoigi. Son lea earret eará oassálastán Sámi Grand Prix juoigangilvvuin Guovdageainnus.

– Mu mielas lei dehálaš ráhkadit juste mánáide oahppogirjji, go mánáid duohken lea dál min giela boahttevuohta ja seailluheapmi. Ja dat leage vuosttaš oahppogirji gielddasámegillii 30 jahkái, mii lei almmuhuvvon Ruošša beale Sámis.

• Loga: Unnán doarjja Zoja ja Natalja bargui gádjut máttuideaskka giela

Grinčuk sávašii girjji šaddat ollugiidda ávkin.

– Mun movttiidahttojin bargat dáinna girjjiin go jurddašin, ahte mu mánáidmánát besset geavahit dan go ohppet min guovllu sámegiela. Ieš dat oahppogirji šaddá buorren veahkkin mánáide oahppat giela sihke ruovttus ja kurssain, navdá Grinčuk.

• Loga: Mánát báitet lávddi alde máttuideaset gillii

Lohkat, liibmet ja stoahkat

Oahppogirjjiin mánát besset sihke lohkat, liibmet govažiid girjái ja stoahkama bokte oahppat sámegiel sániid ja cealkagiid.

Dima Kobelev ii dieđe vissásit leago dát girji miellagiddevaš, muhto áigu ruovttus etniinis geahččat dan. Eatnis sániid mielde gánda áiggošii oahppat gielddasámegiela.

Dál leat almmuhuvvon vuos duhát gáhppálaga dán oahppogirjjis. Barggut ja almmuheapmi ruhtaduvvui Murmánskka guovllu stáhtalaš prográmma bokte.

– Midjiide lea dehálaš, ahte beassat ráhkadit ja almmuhit gielddasámegiel oahppogirjjiid. Dál doaivut, ahte min sámi čállit ja gielladovdit lágidit eanet oahppogirjjiid, go mis lea vejolašvuohta almmuhit daid, lohká Guoládaga Sámiid Searvvi presideanta Jelena Ročeva.

Gielddasámegiella lea Unesco áiton gielaid rukseslisttus. Gielas leat sullii čuođi aktiivvalaš giellaguoddi.

• Loga: Ovddideaba áiton giela buoremus sáddenáiggis