Áiguba meaštáriid dássái

– Na, mun lean sirdán Kárášjoga vuodjansearvái go dáppe lea buoret hárjehallan go Leavnnjas, ja dáppe leat eambbo hárjehallamat, dadjá 13 jahkásaš, Aleksey Koriachko Johansen.

3-4 geardde vahkkosaččat

Leavnnjas lea buorre vuojadan alddis, muhto sutnje ii leat dál vuojadanbiras doarvái hástaleaddji ja dan lohká leat Kárášjogas. Son hárjehallá Kárásjogas golmma njealja

gearddi vahkkui ja juohke hárjehallan mearkkaša 15 miilla guhkkosaš mátki, Leavnnjas Kárášjohkii ja ruovttoluotta. Sus lea čielga mihttu dainna vuodjanhárjehallamiin:

– Mun áiggun šaddat norggameašttirin, fástida son go jearan.

Su vuodjanustit ja seamma ahkásaš, Eelis Niittyvuopio, jođaša gis Gáregasnjárgga ja Kárášjoga gaskka, mii lea sullii guovtte miilla mátki ovtta guvlui. Son maid liiko valástallat ja go jearan makkár dássái son áiggošii olahit dainna vuodjamin, de fástida:

Mihttun lea oassálastit buot gilvvuin ja vuoitit buot. Mun gáttán mun olahan suomameašttir vuodjangilvvuide. Dieppe lea veahá garrasat dássi go Norggas.

– Man guhkás áiggot don olahit?

– Na, suoma buoremusaid searvái, fástida Eelis

Duhtavaččat bohtosiiguin

Dán vahkkoloahpa leaba soai oassálastán "Arctic Winter Swim" nammasaš vuodjangilvvuin Kárášjogas. Gilvvuide ledje boahtán guhtta vuodjansearvvi Ruoššas, oktiibuot 50 vuoddjiin.Dasa lassin ledje Finnmaárkku vuodjansearvviin vuoddjit dappe, muhto eai nu ollu go dát vahkkoloahppa lei oassi mánáid- ja nuoraid dálveluomus, muitala okta Kárášjoga vuodjansearvvi hárjeheaddjiin, Doris Norby.

50 mehtera friddjavuodjamis vuolidii Eelis iežas buoremus olahusa 30:58 sekundii, vuojai measta sekundda johtilabbot go dan maid ovdal lea nagodan. Maiddái eará surggiin lea son buoredan áiggiidis.

– Mun lean hui duhtavaš, dadjá Eelis ja lasiha ahte nu son gal lei ge meroštallan ieš ovdagihtii, go dál orru bures mannamin.

– Hui suddu go eaba beasa vuodjat iežaska báikkiin muhto soai leaba buresboahtimat Kárášjogas vuodjat, lohká Norby.

Muđui leat Leavnnjas golbma eará vuoddji go Aleksey, geat maid vudjet Kárášjoga searvvi namas ja Gáregasnjárggas leat nuppelohkái máná geat čuvvot vuodjansearvvi fálaldaga,

Buorre biras

Finnmárku vuodjanbiire jođiheaddji, Ragnhild Tapio, rámida Kárášjoga vuodjansearvvi:

– Mun háliidan dadjat ahte dáppe lea mielahis buorre vuodjanbiras. Sis leat buorit veahkit, buori hárjeheaddjit ja mearkkaša hui olu go vuoddjin alddiset lea hárjehallan dáhttu ja dáhttu buorrin šaddat.