Leat go don diekkár geas johtilit juolggit gollojit? Gean juolggit eai oro goassege liegganeame dálvet? Na dalle don dieđát makkár lihkku lea albma buriid teffeliiguin. Mon lean diekkár galbmačuoika, nu aht’ mu teffelat čužžot uvssa sisbealis mu vuordimin juohke beaivvi go boađán ruoktut, ja dat eai goassege beahte mu.
Einar, guhte lávii min luhtte guossástallat ovdal juovllaid, doalai teffeliid gollan. Dasa mon in ollunge mieđihan! Mu teffelat leat ránes ullus ja sastevuođuin, diekkár áibbas dábálaš teffelat. Jocca lea jávkan nuppi bealis ja olgešjuolgebealis lea stuorra ráigi. Heret gurut teffel lea seammaláganin. Eai dat illá čábbát dál šat dat teffelat, ja dát dat lei ge suige maid Einar lei huomidan , lassin ahte šlohten ja suibon go teffeliid bidjen juolgái.
Mon muitalin sutnje ahte go mon nuorran vázzen joatkkaskovllá, delle mon juhken lanja Márehiin geas ledje juste seammalágan teffelat go mus dál leat. Muhto su teffelat eai bálljo heaŋgun čoahkkái, muhto lihkka son ráhkistii teffeliiddis. Mon veahá gáđaštin su go sus ledje nu buriid, liegga teffelat main lei sadji ulloguobáide ja visot, nu ahte go mon viimmat, ovccilogilogus, galgen oastit teffeliid, de osten diekkáriid.
Dakkaviđe go coggen daid, de dobden ahte DÁT gal ledje mu teffelat. Ja dál, máŋga beaivvi ja jagi maŋŋel, dat teffelat leat mu jiellatteffelat. In mon oba ge huomit ge man boarrásat ja gollan dat leat, ja nu suige gártá ge daid diŋggaiguin maid leat guhka atnán ja masa duođai liikot. Go bijan teffeliid, de dovddan iežan ollisin.
Mus ii leat obanassiige hállu molsut eret dáid teffeliid ođđa teffeliidda, váikko dat ođđa livčče áibbas seammaláganat go mu otná teffelat. DAT leat mu jiellat-teffelat. Vasttit, gollan, na juo. Lihkká mon in hálit go juste DÁID. Veahá buorre dat han nai lea, atnit juoga mii lea gollan muhto lihkká nu buorre. Dege, maid don jáhkát? Livččet go don daid lonuhan eret?