Guovdageainnu girjerádjosis lágida kulturossodat nuvttá čuoldinkursa.
Čuoldinkursa álggii njukčamánus ja bistá oktiibuot sullii guokte mánu.
Prošeaktajođiheaddji Ellen Ravdna Sara muitala, ahte ulbmil kurssain lea oažžut olbmuid girjerádjosii, vai Guovdageainnu girjerájus geavahuvvošii eambbo.
Gáibida ollu áiggi
Duddjon lea áddjás bárgu, ja nu leatge oasseváldit mearkkašuhttán.
Sara muitala ahte okta oasseváldi dál atná árvvus duoji eambbo maŋŋá go ieš čuoldigođii, go dalle son oinnii man olu bargu sámi duojis lea.
Ellen Susanne Klemetsen oahpai čuoldit eatnistis, ja dál son oahpaha earáid čuoldit.
Sihke prošeaktajođiheaddji ja čuoldinoahpaheaddji mielas lea dehálaš oahpahit earáide árbevirolaš doaimmaid.
Dárbbašlaš oahppat
Máret Risten Sara muitala ahte son lea oahppan olu kurssas, ovdamearkka dihte mo ovdal lávejedje mihtidit láiggiid.
Kursa lea leamaš ávkkálaš Máret Ristenii, go son ii leat ovdal oaidnán mo čuoldá, ii ge leat ieš čuoldán. Su mielas lea hui dárbbašlaš oahppat dáid doaimmaid:
– Dá han lea dakkár diŋga maid eai nu ollugat bargga dán áigge šat. Dat nohká várra eambbo aht` eambbo.