Akšunisttat bivdet stáhtaministara Jonas Gahr Støre váldit ovddasvástádusa Fovse-áššis, ja áigot giddet beassama su kantuvrii.
Sii áigot idjadit Stáhtaministara kantuvrra olggobealde fuomášahttin dihte ahte ihttin, geassemánu 3. beaivvi, leat 600 beaivvi vássán dan rájes go Alimusrievtti duopmu celkui olmmošvuoigatvuođarihkkuma hárrái.
NSR Nuoraid jođiheaddji Elle Nystad čállá preassadieđáhusas ahte akšunisttaid gáibádus lea ahte bieggaturbiinnat gaikkoduvvojit Fovses.
Akšunisttat čállet preassadieđáhusas ahte sis leat sihke láhkkit ja oađđinseahkat, ja ahte eai dáhto sirdit iežaset jos bolesat dan gáibidivčče.
Akšuvdna álggahuvvui šloahta olggobealde odne, ja sihke stáhtaministtar ja oljo- ja energiijaministtar Terje Aasland deaivvadeigga singuin šloahta šiljus.
– Vuosttažettiin de lean hui ilus dinguin deaivvadit dáppe dál. Mii leat aiddo leamaš Stáhtaráđis, ja háliidan muitalit didjiide ahte ášši ii leat orustan, dajai stáhtaministtar Jonas Gahr Støre go deaivvadii akšunisttaiguin šloahta olggobealde.
Romssa Sámiid Searvvi-NSR (RSS-NSR) jođiheaddji Hilde Pedersen oaivvilda Fovse-ášši hehttet sápmelaččaid ja eiseválddiid seanadeami.
– Mu mielas lea ilgat. Mu mielas eiseválddit fertejit čorget dili. Seanadeapmi lea veadjemeahttun ollugiidda nu guhká go Fovses ain rihkkojuvvojit olmmošvuoigatvuođat, dadjá Pedersen NRK:i.
Lávvardaga leat 600 beaivi gollan das rájes go Alimusriekti nannii, ahte sierralobit mat leat addon guovtti bieggaindustriijaguvlui Fovses leat lobiheamit go rihkkot boazosápmelaččaid rievtti doaimmahit kultuvrraset.
Guktot bieggaindustriijaguovllut leat ain doaimmas.
Dán oktavuođas doallá RSS-NSR lávvardaga doarjjadoaluid Romssa guovddážis Fovse boazosápmelaččaide.
Les på norsk
Ánde lea dovddus sámi profiila Juŋkká YouTube-kanálas. Dán jagáš lávlaga namma lea "Moai girde" ja lávlla lea dan birra ahte juohkehaš lea mávssolaš.
Dán jagáš BlimE-lávlaga mihttun lea fuomášuhttit man juohkehaš lea. Buohkat sáhttet lea mielde váikkuheamen iežaset vuogi mielde, justa nu movt sii leat ja dainna mainna sii máhttet.
– Lávlla mearkkaša munnje ahte don duostat leat don ja ahte ii dárbbaš álo fuolastuvvat maid earát oaivvildit du birra, mo don leat oaidnit dahjege maid don barggat.
– Mun lean ieš jurddašan: maid son earát jurddašit jus mun gárvodan ná, dahje maid jus mun ordnen iežan vuovttaid ná? Muhto ii leat nu dehálaš maid earát oaivvildit, nu guhká go mun ieš liikon dasa, ja mii buohkat galgat sáhttit leat nu mo mii ieža háliidat!, dadjá Ánde.
Son muitala ahte ođasin dán jagi lea ahte BlimE-lávlla lea sihke davvi-, julev- ja máttasámegillii.
– Lea leamašan veahá hástalus, muhto lea mannan bures, dadjá Ánde.
BlimE-lávlagat ja musihkkavideot almmuhuvvojit geassemánu 16. beaivvi.
